PA-nın şöbə müdiri Ədalət Vəliyev və Razi Nurullayev arasında görüş keçirilib

Tarix: 5 Sentyabr 2020 13:42

Sentyabrın 4-də Prezident Administrasiyasının şöbə müdiri Ədalət Vəliyev ilə yeni dövlət qeydiyyatına alınmış Milli Cəbhə Partiyasının sədri Razi Nurullayev arasında görüş keçirilib.

Sonxeber.net Trend-ə istinadən bildirir ki, ilk öncə Ədalət Vəliyev partiyanın qeydiyyatdan keçməsi münasibəti ilə ölkə başçısı adından Razi Nurullayevi təbrik etdi və partiyanın fəaliyyətində uğurlar arzuladı.

R.Nurullayev Azərbaycan Respublikasının Prezidenti cənab İlham Əliyevə minnətdarlığını bildirərək, Azərbaycan Xalq Cəbhəsi Partiyasının (AXCP) daxilində olan qeyri-sağlam abu-havanı və daxili qarşıdurmaları nəzərə alaraq, öz tərəfdaşları ilə AXCP-dən ayrılaraq yeni partiyanın yaradılması qərarı barədə məlumat verib.

Görüşdə ölkədə aparılan islahatlar, korrupsiya ilə mübarizənin daha da sərtləşdirilməsi, vətəndaş-məmur münasibətlərinin sağlam prinsiplər üzərində qurulması, yeni siyasi konfiqurasiyanın formalaşması və iqtidar-müxalifət siyasi dialoqu uğurla həyata keçirildiyini vurğulanıb.

Həmçinin "Siyasi partiyalar haqqında" qanuna dəyişiklərin edilməsi zərurəti, qanunlara riayət edilməsinə nəzarətin gücləndirilməsi, siyasi partiyaların maliyyə hesabatlılığı müzakirə olunub.

Bundan əlavə koronavirus infeksiyasının qarşısının alınmasında dövlət tərəfindən görülən tədbirlərin əhəmiyyəti vurğulanmaqla yanaşı, pandemiya dövründə Azərbaycan iqtisadiyyatının dayanıqlılığı nəticəsində sosial layihələrin təxirəsalınmadan həyata keçirilməsi, vətəndaşların sosial rifahının yaxşılaşdırılması istiqamətində görülən işlər barədə fikir mübadiləsi aparılıb.

Daha sonra iqtidar-müxalifət siyasi dialoqunun və siyasi partiyalarla sağlam əməkdaşlığın qurulmasının nəticəsi olaraq, Milli Cəbhə Partiyası daxil olmaqla son 5 ay ərzində 6 siyasi partiyanın dövlət qeydiyyatına alınması və 10 siyasi partiyanın Qurultayların keçirilməsi və təsis sənədlərində edilmiş dəyişikliklərin dövlət qeydiyyatına alınması faktı qeyd olunub.

Görüş zamanı iyulun 12-dən başlayaraq baş vermiş hərbi təxribat fonunda, Azərbaycanda fəaliyyət göstərən siyasi partiyaların milli həmrəyliyi, dövlətçiliyimizin, ərazi bütövlüyümüzün qorunmasında mövqeləri yüksək dəyərləndirilib. 43 siyasi partiyanın birgə bəyanatı, 4 siyasi partiyanın isə ayrılıqda Ali Baş Komandan ətrafında birləşməsi ölkədə sağlam iqtidar-müxalifət münasibətlərinin formalaşmasının nümunəsi olduğu vurğulanmışdır.

Bununla yanaşı siyasi partiyaların aktivləşməsi, "Azərbaycan" qəzetində "Milli maraqlar naminə əməkdaşlıq" rubrikasının açılması, siyasi partiya nümayəndələrinin televiziya, internet TV kanallarında, müxtəlif KİV-də fəal çıxışları müsbət hal kimi qiymətləndirilərək, yeni siyasi konfiqurasiyanın təzahürü olduğu vurğulanmışdır.