Gənc sahibkarlar mükafatlandırıldı

Tarix: 11 Sentyabr 2020 14:33

Bakı. Trend:

Sentyabrın 9-da dünya kuboku uğrunda yarışan gənc sahibkarların mükafatlandırılması mərasimi baş tutub.

Trend-in məlumatına görə, 29-30 avqust tarixlərində Azərbaycan Respublikasının Gənclər Fondu və BP şirkətinin təşkilatçılığı ilə “2020-ci il Enactus Azərbaycan Virtual Milli Yarışı” keçirilmişdir. Final mərhələdə iştirak edən 16 komandadan 4-ü yarışın finalına vəsiqə qazanmış və məhz onlar arasından qaliblər və nominasiyalar üzrə mükafatçılar yarışın idarə heyətinin üzvləri tərəfindən seçilmişdir.

Mükafatlandırma mərasimində Azərbaycan Respublikasının Gənclər və İdman nazirinin müavini İntiqam Babayev, Azərbaycan Gənclər Fondunun icraçı direktoru Fərid Cəfərov, Kiçik və Orta Biznesin İnkişafı Agentliyinin İdarə Heyəti sədrinin müavini Nadir Aydınov, Nəqliyyat, Rabitə və Yüksək Texnologiyalar Nazirliyinin şöbə müdiri Rəşad Əzizov iştirak etmişlər. Rəsmilər yarışmada qalib gələn Bakı Dövlət Universiteti, Azərbaycan Dövlət İqtisad Universiteti, Azərbaycan Memarlıq və İnşaat Universiteti, Bakı Mühəndislik Universitetinin komandalarının hər birinə kubok, sertifikatlar, komandaların kapitanları Rüstəm Həsənli, Orxan Nəciyev, Nərminə Hüseynli, Kamil Əliyevə hədiyyələr, eləcə də nominasiyalar üzrə seçilmiş komanda üzvləri Otubide Əhmədi Rza, Günel Əliyeva, Əli Həsənli, Nilufər Əsgərzadə və Arzu Mahmudovaya hədiyyələr təqdim etmişlər.

Bu ilki yarışda ilk yeri tutan Bakı Dövlət Universitetinin komandası cari ilin sentyabr ayında virtual şəkildə keçiriləcək “Enactus Dünya Kuboku 2020”də ölkəmizi təmsil etmək hüququ qazanıb.

1975-ci ildə ABŞ-da təsis edilən “Enactus” proqramı indiyədək 72 mindən artıq iştirakçını əhatə edib və hər il 1.3 milyon insanın həyatını müsbət istiqamətdə dəyişir.

Əsas məqsədi gəncləri sahibkarlıq fəaliyyətinə cəlb etmək, onların nəzəri biliklərini təcrübədə tətbiq etmələrinə yardım göstərmək, biznes, təhsil və sosial layihələr həyata keçirmək, xüsusilə də ölkələrdə kiçik və orta sahibkarlığin inkişafına dəstək vermək olan “Enactus” proqramına Azərbaycan 2005-ci ildən qoşulub.