Aktual mövzular: Dollar alış-satışı, Məzənnə, Neftin qiyməti

Kardioloq Emin Hacıbalayev “Aritmiya olan xəstələr sağlamlıqlarını necə qorumalıdır” sualını cavablandırır

Kardioloq Emin Hacıbalayev “Aritmiya olan xəstələr sağlamlıqlarını necə qorumalıdır” sualını cavablandırır

Tarix: 15 Sentyabr 2020 16:36

Bakı. Samir Əli - Trend:

Aritmiya zamanı normal ürək ritminin tezliyi, həmçinin ürəyin elektrik keçiriciliyi pozulur. Ürək aritmiyaları adətən ürəyin vurğularını idarə edən impulsların işi pozulduğu zaman əmələ gəlir. Bu vaxt ürək ya çox tez, ya çox gec, ya da nizamsız vurur. İnsanlar aritmiyaları ürəyin dayanması, əsməsi, tez-tez döyünməsi kimi hiss edirlər. Ürək döyünərkən impulslar ürək əzələsinə təsir edir və onun yığılmasına səbəb olur. Aritmiya çox vaxt insanlarda qorxu hissi yaradır.

Trend-in məlumatına görə, bu barədə Mərkəzi Gömrük Hospitalının invaziv kardioloqu Emin Hacıbalayev "Həkim məsləhəti" rubrikasında Aritmiya, onun səbəbləri və əlamətləri mövzusunda “Aritmiya olan xəstələr sağlamlıqlarını necə qorumalıdır” sualını cavablandırarkən deyib. O bildirib ki, aritmiya zaman normal ürək ritminin tezliyi, həmçinin ürəyin elektrik keçiriciliyi pozulur: "Ürək aritmiyaları adətən ürəyin vurğularını idarə edən impulsların işi pozulduğu zaman əmələ gəlir. Bu vaxt ürək ya çox tez, ya çox gec, ya da nizamsız vurur. İnsanlar aritmiyaları ürəyin dayanması, əsməsi, tez-tez döyünməsi kimi hiss edirlər. Ürək döyünərkən impulslar ürək əzələsinə təsir edir və onun yığılmasına səbəb olur. Aritmiya çox vaxt insanlarda qorxu hissi yaradır.

Aritmiyanın simptomları arasında sinədə əsməni, artan ürək döyüntülərini, azalan ürək döyüntülərini, sinədə ağrını, təngnəfəsliyi, başgicəllənməni, ürəkkeçməni göstərmək olar. Bəzi hallarda aritmiyalar kəskin ürək ağrıları, hava çatışmazlığı hissi ilə də müşayiət olunur. Bəzən isə aritmiya simptomsuz da keçə bilər".

Kardioloq bildirib ki, aritmiyanın səbəbləri ürək xəstəlikləri, hipertoniya xəstəliyi, şəkərli diabet, siqaret çəkmə, spirtli içki qəbulu, dərman və kofein asılılıqları, stresslər, bəzi dərmanlarla və otlarla aşırı müalicə, ürək əzələsində olan çapıqlardır: "Bundan başqa, ürəyin qidalanması pozularsa, bu zaman elektrik impulsları yaradan hüceyrələrin də qidalanması pozulur. Ürək toxumasının zədələnməsi zamanı da aritmiya yaranır.
Aritmiyaların diaqnostikasının ilkin mərhələsi terapevt və ya kardioloq tərəfindən həyata keçirilir. Bu zaman pasiyentin şikayətləri analiz edilir, ürəyin ritm pozulmalarını göstərən nəbzin vurğuları müəyyənləşdirilir. Nəbzin vurğularında pozulmalar olarsa, qeyri-invaziv olan EKQ, EKQ-monitorinq və invaziv transezofagial EKQ, ürəkdaxili elektrofizioloji müayinələr aparılır.

Aritmiya olan xəstələr sağlamlıqlarını qorumaq üçün ilk əvvəl, müalicə üçün həkimin göstərişlərinə əməl etməlidirlər. Bu xəstəlik müalicə olunmazsa, hansı xəstəliklərə yol aça bilər? Aritmiya ürək fəaliyyətinin və ya başqa orqanların funksiyalarının ağır pozulmalarına səbəb ola bilər; bu pozulmalar ürəkdöyünmə, ürək fəaliyyətində kənaraçıxmalar və ya dayanma, zəiflik, başgicəllənmə, döş qəfəsində ağrı və ya təzyiq, təngnəfəslik, bayılma ilə özünü büruzə verir. Aritmiyalar vaxtında müalicə olunmadıqda stenokardiya tutmaları, ağciyər ödemi, trombemboliya, kəskin ürək çatışmazlığı və s. ürəyin dayanmasına səbəb ola bilər.

Aritmiyaların müalicəsində dərman terapiyası və kardiocərrahi metodlar olan radiofrekans ablasiya, elektrokardiostimulyator, kardioverter-defibrilyator qoyulması tətbiq olunur. Vaxtında həkimə müraciət etməklə, aritmiyanı müalicə etmək mümkündür. Gecikdirilmiş hallarda xəstəni cərrahi müdaxilə yolu ilə müalicə edirlər.

Aritmiyası olan xəstələrə tövsiyəm budur ki, həkimlərin göstərişlərinə əməl etsinlər, mütləq müalicəyə başlasınlar. Həmçinin, oturaq həyat tərzi keçirənlər fiziki aktivliyi artırsınlar, havada çox gəzsinlər, siqarət çəkməsinlər, alkoqollu və kofeinli içkilərdən uzaq olsunlar, sağlam qidalansınlar və hər cür stressləri azaltsınlar".


Etiketlər:  Kardioloq Emin Hacıbalayev Aritmiya olan xəstələr sağlamlıqlarını necə qorumalıdır sualını cavablandırır


RƏYLƏR



Populyar Xəbərlər

XƏBƏR LENTİ