''Bu, həyatımda gördüyüm ən qürurverici hadisə idi'' - Müharibə iştirakçısı olan həkim - FOTO

Tarix: 8 Dekabr 2020 12:03

Azərbaycan Ordusu 44 günlük müharibə ilə 30 illik vətən, torpaq həsrətinə son qoydu. Azərbaycan bu qələbəni əsgərlərinin, zabitlərinin qanı, canı bahasına əldə etdi. Amma bu tarixi qələbənin digər qəhrəmanları olan həkimlərimizin də əməyini qeyd etməyə bilmərik.

Müharibənin qızğın anında Türkiyədə çalışan və təhsil alan 50 nəfərə qədər azərbaycanlı tibb mütəxəssisi ölkəmizin ərazi bütövlüyünün bərpa edilməsi naminə gedən döyüşlərdə yaralanan əsgərlərimizin müalicə prosesində könüllü tibbi xidmət göstərmək məqsədilə döyüşlərin getdiyi ərazilərdə fəaliyyət göstərən səyyar tibbi məntəqələrdə və xəstəxanalarda əllərindən gələni əsirgəmədilər. 

Belə həkimlərdən biri də Tərtərdə, Füzulidə və Bərdədə yaralı əsgərlərimizin həyatlarını xilas etmək üçün var qüvvəsi ilə xidmət edən Nazir Allahverdi həkimdir. O, Sonxeber.net-a açıqlamasında müharibə zamanı qarşılaşdığı hadisənin təsirindən çıxmadığını bildirib:

"Təxminən bir ay bundan qabaq məhkəmə tibbi müayinəyə iki şəhid hərbi qulluqçu gətirildi. Şəhidi gətirən hərbiçilərin zabit yoldaşları göz yaşlarını saxlaya bilmirdi. İnanın, həmin anları sözlə ifadə etməyə çətinlik çəkirəm. Mülki şəxslər hərbçilərə oturub dincəlməyi xahiş etdi. Bu zaman ağsaqqal bir şəxs zabitlərə hərbi çəkməni çıxartmalarını söylədi. Özləri çəkmələrini çıxartmayınca ağsaqqal əyilərək çəkmənin qaytanlarını açmağa başladı. Bu zaman digər bir şəxs vanna gətirərək hərbçilərin ayaqlarını yumağa başladı. Həyatımda gördüyüm ən möhtəşəm və qürurverici səhnə idi".

Təhməz Əsədov