Ağdamın Qiyaslı kəndində xeyli sayda mina və döyüş sursatı tapılaraq zərərsizləşdirilib (FOTO/VİDEO) (ƏLAVƏ OLUNUB)

Tarix: 5 Yanvar 2021 19:10

Ağdam. Samir Əli - Trend:

2021-ci il 04 Yanvar tarixində Daxili İşlər Nazirliyinin Ağdam rayon Polis Şöbəsi tərəfindən Ərazilərin minalardan təmizlənməsi üzrə Milli Agentliyə (ANAMA) Ağdam rayonu, Qiyaslı kəndi ərazisində xeyli sayda mərminin tapılması barədə məlumat daxil olub.

ANAMA-dan Trend-ə daxil olan məlumata əsasən, Agentliyin xüsusi mobil çevik əməliyyat qrupu və Daxili İşlər Nazirliyinin Ağdam rayon Polis Şöbəsinin əməkdaşları dərhal həmin əraziyə göndərilib.

Agentliyin mütəxəssisləri və Ağdam rayon Polis şöbəsinin əməkdaşları tərəfindən birlikdə yuxarıda adı qeyd olunmuş əraziyə baxış keçirilib. Təhlükəsizliyi təmin etmək məqsədilə ərazi polis tərəfindən mühasirəyə alınmışdır. Həmin ərazinin düşmənin döyüş mövqeyi olduğu və mülki sakinlərə və obyektlərə qarşı oradan atışların həyata keçirildiyi müəyyən olunmuşdur. Agentliyin mütəxəssisləri tərəfindən aparılan təcili təxirəsalınmaz əməliyyat-axtarış tədbirləri nəticəsində, ümumilikdə 528 ədəd sursat: 3 ədəd top mərmisi (2 ədəd 152 mm-lik OF-540 və 1 ədəd 100 mm-lik OF-32), 72 ədəd QRAD qurğusundan atılan 122 mm-lik 9M22U raketi, 5 ədəd minaatan mərmisi (82 mm-lik S-832), 2 ədəd TM62P tank əleyhinə minası, 419 ədəd partladıcı, eləcə də 27 ədəd AĞ FOSFOR tərkibli (25 ədəd 82 mm-lik M-74 WP çaplı və 2 ədəd 120 mm-lik BF çaplı) tüstülü (D-4) (P-4) minaatan mərmisi aşkar edilmişdir.

Aşkar olunmuş sursatlar 2021-ci il 05 yanvar tarixində Agentliyin mütəxəssisləri tərəfindən Daxili İşlər Nazirliyi və Dövlət Təhlükəsizliyi Xidmətinin əməkdaşlarının iştirakı ilə partlayış yolu ilə yerində zərərsizləşdirilmişdir.

Qeyd edək ki, ağ fosfor tərkibli mərminin mülki əhaliyə və obyektlərə qarşı istifadə edilməsi “Bəzi adi silahlara dair Konvensiyalar”-a (“Həddindən artıq zərərli və ya ayrı-ayrı təsiri ola bilən bəzi adi silahların istifadəsinə qadağa və ya məhdudlaşdırma haqqında Konvensiya”) (1980) aid Protokol III müvafiq olaraq beynəlxalq humanitar hüququn tələblərinə və prinsiplərinə görə qadağandır.

Bu bir daha erməni silahlı qüvvələrinın mülki insanlara qarşı hərbi cinayət törətdiklərini sübut edir.

XXX

17:49

Ərazilərin Minalardan Təmizlənməsi üzrə Milli Agentliyi (ANAMA) Ağdam rayonunun minalardan təmizlənməsi işlərini davam etdirir.

Trend-in hadisə yerində olan müxbirinin verdiyi məlumata görə, ANAMA tərəfindən rayonun Qiyaslı kəndi ərazisində çoxlu sayda partlamamış mərmi - minalar və qadağan olunmuş sursatlar aşkar edilib. Mərmilərin daşınması təhlükəli olduğundan yerindəcə məhv edilib.

Qeyd edək ki, ərazidə əməliyyat axtarış tədbirləri həyata keçirilir.