“iPhone 13” smartfonunun xüsusiyyətləri açıqlanıb

Tarix: 9 Fevral 2021 23:56

Yeni "Apple" smartfonları təkmilləşdirilmiş kamera sistemi ilə təchiz ediləcək. Bu barədə "MacRumors" nəşrinin "Barclays" analitiklərinə istinadən məlumatında deyilir.

Milli.Az ictnews.az-a istinadən bildirir ki, analitiklər Bleyn Kertis və Tomas Omelli tərəfindən sərmayədarlar üçün tərtib edilən məlumata görə, buraxılışı 2021-ci ilə planlaşdırılan "iPhone" modellərinin əsas xüsusiyyəti yeni kamera olacaq. Mütəxəssislər dəqiqləşdirib ki, qurğuların enlibucaqlı obyektivləri təkmilləşdirilmiş (f/2.4-dən f/1.8-dək) apertura ilə təchiz olunacaq.

Bildirilir ki, müvafiq yeniləmə qurğunun kamerasına daha çox işıq almağa imkan verəcək ki, bu da pis işıqlandırma şəraitində çəkilən fotoşəkil və videonun keyfiyyətini artıracaq. "Barclays" analitikləri əmindir ki, təkmilləşdirilmiş kameralarla "iPhone 13" seriyalı bütün smartfonlar təchiz ediləcək. Həmçinin "13 Pro" və "13 Pro Max" modellərində teleobyektivlər "f/2.2" aperturasına və 65 millimetr fokuslama məsafəsinə malik olacaq ki, bu da kameranın xüsusiyyətlərini yaxşılaşdıracaq. Komponent hissələrin tədarükü ilə "Cirrus Logic" şirkəti məşğul olacaq.

Beləliklə, "Barclays" şirkətinin hesabatı tanınmış analitik Min-Çi Konun məlumatlarını təsdiq edir. Belə ki, o, noyabrda yeni "Apple" smartfonlarının fərqləndirici cəhətinin yeni kamera sisteminin olacağını bildirmişdi. Lakin analitikin fikrincə, yeniləmə ilə seriyanın yalnız qabaqcıl modelləri - "iPhone 13 Pro" və "13 Pro Max" təchiz ediləcək.

Milli.Az