Ermənilər bu ərazilərdə əbədi otura bilməyəcəklərini öncədən bildikləri üçün...

Tarix: 17 Mart 2021 01:00

"Azərbaycanın işğaldan azad olunmuş ərazilərinə Prezidentin davamlı səfərləri bu ərazilərdə erməni işğalının və erməni təcavüzünün mahiyyətini bütün dünyaya göstərmək baxımından əhəmiyyətli, tarixi hadisələrdir".

Bunu Sonxeber.net-a açıqlamasında "Bakı xəbər" qəzetinin baş redaktoru, siyasi ekspert Aydın Quliyev deyib.

Ekspert bildirib ki, Prezidentin bu ərazilərə səfərləri erməni vəhşiliyinin və vandalizminin mahiyyətini dünyaya göstərmək baxımından əhəmiyyətlidir:

"Bu səfərlər zamanı həm Azərbaycan ictimiyyəti, həm dünya birliyi bir daha əmin olur ki, bu ərazilər həqiqətən Azərbaycanın tarixi torpaqlarıdır. Hətta ermənilər o əraziləri 30 il işğal altında saxlamalarına baxmayaraq, onlar da bu ərazilərdə əbədi otura bilməyəcəklərini öncədən bilirdilər. Buna görə də ermənilər həmin torpaqlarda əbədi qalacaqlarına əmin olmadıqlarına və bu torpaqları Azərbaycandan həmişəlik qopartmağın mümkün olmadığına əmin olduqları üçün bu ərazilərdə qlobal və genişmiqyaslı, dəhişətli dağıntılar törədiblər. Azərbaycanın tarix, mədəniyyət abidələrini məhv ediblər, həmin ərazilərdəki torpaq fondunu yandıraraq, yaxud da ki, illər boyu susuz buraxaraq məhv ediblər, həmin ərazilərin altındakı sərvətləri talan ediblər, üstündəki maddi-mədəni abidələri imkan düşdükcə məhv ediblər və yaxud da ki, onun mənsubiyyətini dəyişməyə cəhd göstəriblər. Bir sözlə, bu ərazilərdən həm öz mənafeləri naminə onun sərvətlərindən istifadə ediblər, orada olan mədəni, maddi dəyərləri məhv edərək Azərbaycan xalqından qisas alıblar. Prezidentin bu ərazilərə səfərləri erməni vəhşiliyinin və vandalizminin mahiyyətini dünyaya göstərmək baxımından əhəmiyyətlidir".

A.Quliyev deyib ki, Prezidentin qəti mesajı bundan ibarətdir ki, Dağlıq Qarabağın hüdudları çərçivəsində olan əraziyə hər hansı bir milli inzibati statusun verilməsi ilə bağlı heç bir halda müzakirə aparmayacaq:

"Dağlıq Qarabağ Muxtar Vilayətinin inzibati sərhədləri daxilində yerləşən Xocavəndə səfər digər rayonlara səfərlərdən prinsipcə fərqlənir. Yəni Prezidentin eyni vaxyda müxtəlif fasilələrlə bir neçə ay ərzində Ağdama, Füzuliyə, Cəbrayıla, Qubadlıya və Zəngilana səfərləri ilə keçmiş Dağlıq Qarabağ Muxtar Vilayətinin sərhədləri daxilində olan Xocavəndə səfərinin arasında prinsipial fərq görürəm. Bu fərq ondan ibarətdir ki, Prezident Dağlıq Qarabağ Muxtar Vilayətinin hüdudları çərçivəsindəki Xocavəndə səfər etməklə dünyaya qəti bir mesaj vermiş oldu ki, Azərbaycan nəinki Dağlıq Qarabağın ətrafındakı 7 rayonu, hətta Dağlıq Qarabağın özünün hüdudları daxilindəki bütün əraziləri də erməni işğalından azad edib və etməkdə də davam edəcək. Prezidentin qəti mesajı bundan ibarətdir ki, Dağlıq Qarabağın hüdudları çərçivəsində olan əraziyə hər hansı bir milli inzibati statusun verilməsi ilə bağlı heç bir halda müzakirə aparmayacaq və Azərbaycan keçmiş sovet Azərbaycanının tərkibində olan Dağlıq Qarabağ Muxtar Vilayətinin hüdudları çərçivəsində hər hansı bir status barədə müzakirə aparmaq fikrində deyil. Eyni zamanda Prezidentin Xocavəndə səfəri bir daha nümayiş etdirdi ki, ermənilərin separatçı "Dağlıq Qarabağ respublikası" yaratdıqları, vaxtilə sovet Azərbaycanının tərkibinə daxil olmuş Dağlıq Qarabağ Muxtar Vilayətinin sərhədlərini tamamilə dağıtmışıq. Bir sözlə, Prezidentin bu ərazilərə səfəri maraqlı mesajdır və separatçı qurumun gələcəkdə statusla bağlı hər hansı müzakirə aparılacağı ilə əlaqədar bütün ümidlərinə son qoymaq baxımından əhəmiyyətlidir. Prezidentin çıxışında bu ərazilərin bərpa olunacağı və ermənilərin qisas almağa hazırlaşdıqları barədə verdikləri bəyanatın heç bir gələcəyinin olmadığına etdiyi işarələr də önəmlidir. Yəni Prezident bütün dünyaya mesaj verdi ki, həm bu əraziləri bütün gücümüzlə bərpa edəcəyik, həm burada hər hansı bir statusun müzakirəsindən söhbət gedə bilməz, həm də erməni faşizminin və vandalizminin yenidən baş qaldırmasına olan bütün ümidlər əbəsdir və bunun qarşısı qətiyyətlə alınacaq".

Təhməz Əsədov