''SpaceX'' sentyabradək bütün dünyanı naqilsiz internetlə təmin etməyi planlaşdırıb

Tarix: 23 Iyun 2021 22:44

İlon Maskin "SpaceX" kompaniyası sentyabr ayına qədər "Starlink" peyk sistemi vasitəsilə bütün dünyanı naqilsiz internetlə təmin etməyi planlaşdırır.

Sonxeber.net AZƏRTAC-a istinadən bildirir ki, bu barədə "SpaceX" aerokosmik korporasiyasının Prezidenti Qvinn Şotvell "Macquarie Group" texnologiya veb-konfransında çıxışı zamanı deyib.

"Biz kosmosa təxminən 1800 peyk buraxmışıq və onlar işlək orbitə çatdıqdan sonra qlobal internet əhatəsinə malik olacağıq. Bundan sonra tənzimləyici orqanların icazəsini almalıyıq", - deyə o bildirib.

İlon Maskın sözlərinə görə, internet şəbəkəsinə qoşulmaq üçün 500 mindən çox sifariş alıblar.

Artıq ABŞ-ın Rabitə üzrə Federal Komissiyası "SpaceX" kompaniyasının bəzi "Starlink" peyklərinin planlaşdırılandan daha aşağı yerətrafı orbitə yerləşdirilməsi üzrə planlarını təsdiqləyib.

"SpaceX" kompaniyası planetin istənilən nöqtəsində yer kürəsi sakinlərinin genişzolaqlı internetə girişini təmin etməyə imkan verəcək şəbəkənin qurulması üçün hər birinin çəkisi 500 kiloqramadək olan 12 min kosmik aparatı orbitə çıxarmağı nəzərdə tutur. Layihənin reallaşdırılması üçün investisiyaların ümumi həcmi 10 milyard dollardır.