COVID-19-un spesifik müalicə üsulunun olmadığı üçün buster doza vurdurmağa tələsmək lazımdır

Tarix: 1 Noyabr 2021 21:40

Son günlər dünyada, eləcə də Azərbaycanda yeni növ koronavirus (COVID-19) infeksiyasına yoluxma hallarında artım müşahidə edilir. COVID-19 virusunun "delta" ştamı ilə müqayisədə daha yoluxdurucu olan AY.4.2 növü bir sıra dünya ölkələrində, habelə qonşu Rusiyada geniş yayılıb. Azərbaycanda koronavirus infeksiyasına yoluxma artsa da, bir çox ölkələrlə müqayisədə vəziyyət nəzarətdə saxlanılır. Düzgün karantin tədbirləri və vaksinasiya prosesi sayəsində hazırda Azərbaycan dünyada hər milyon nəfərə düşən yoluxma səviyyəsinə görə 99-cu yerdədir. Müqayisə üçün qeyd edək ki, Gürcüstan bu siyahıda 5-ci, Ermənistan isə 45-cidir.

Sonxeber.net AZƏRTAC-a istinadən bildirir ki, mövzu ilə bağlı həkim-infeksionist Vasif Əliyev danışıb. Bildirib ki, pandemiyanın başladığı ilk gündən etibarən virusun mutasiyaya məruz qalaraq çoxalması, fərqli ştamların yaranması gözlənilən idi.

"Yoluxma hallarının sayının artmasına baxmayaraq, digər ölkələrlə müqayisədə Azərbaycanda vəziyyət daha yaxşıdır. Virusdan qorunmaq üçün yeganə vasitə hər kəsin gigiyena qaydalarına riayət etməsi, sosial məsafə saxlaması, qapalı məkanlarda tibbi maska taxmasıdır. Eyni zamanda, vaksinasiya prosesi sürətləndirilməlidir. Bu bəlanın dünyada yayılmağa davam etdiyi bir dövrdə kütləvi immunitetin formalaşdırılması mütləqdir. Bu baxımdan vaksinasiya prosesini sürətləndirmək lazımdır. Vətəndaşlar vaksin olunmağa tələsməlidirlər. Nəzərə almaq lazımdır ki, hazırda xəstəliyin spesifik müalicə üsulu yoxdur. Virusdanqorunma vasitəsi passiv yolla immunizasiyanın yaradılmasıdır. Bu da, əlbəttə ki, yalnız vaksinasiya ilə mümkündür", - deyə həkim-infeksionist bildirib.

V.Əliyev, həmçinin buster doza ilə peyvəndlənmənin əhəmiyyətindən danışıb: "Daha çox risk qrupunda olan, xüsusən xroniki xəstəliklərdən əziyyət çəkənlər infeksiyanı daha ağır keçirə bilirlər. Ona görə də vaksinasiyanın intensivləşdirilməsi, 3-cü doza vaksinasiyanın sürətləndirilməsi vacibdir. Nəzərə almaq lazımdır ki, gələcəkdə daha fərqli ştamların yarana biləcəyi istisna edilmir. Ona görə də peyvənd olunaraq orqanizmdə anticisim yarada və gələcəkdə meydana çıxacaq digər ştamlardan qoruna bilərik".

Mütəxəssislər COVID-19-un yoluxduruculuq və letallıq faizinin daha yüksək olduğu yeni mutasiyaların yaranma ehtimalını nəzərə alaraq vətəndaşların buster (qüvvətləndirici) doza ilə peyvəndlənməsini tövsiyə edir.