“Həyəcan var” - Qurban Qurbanov

Tarix: 17 Fevral 2022 08:22

"Yaxşı komandaya qarşı oynayacağıq. "Marsel"in təcrübəsi böyükdür. Yaxşı baş məşqçiləri və futbolçuları var".

Sonxeber.net qol.az-a istinadən xəbər verir ki, bu sözləri "Qarabağ"ın baş məşqçisi Qurban Qurbanov Konfrans Liqasının pley-off mərhələsində sabah Fransada "Marsel"lə keçiriləcək oyun üçün təşkil edilən mətbuat konfransında deyib.

O, rəqibin güclü olmasına rəğmən komandasına da inandığını bildirib: "Həqiqətən öz komandama güvənirəm, istəkliyik. Burada layiqli oyun göstərmək, yaxşı mübarizə aparmaq istəyirik. İlk dəfədir qrupdan çıxmışıq və belə bir oyuna hazırlaşmışıq. Ən yaxşı oyunlarımızdan birini göstərməyə çalışacağıq. İlk matçda rəqibi daha yaxından tanıyacaq, görüşün gedişində onların gücünü tam biləcəyik. Buraya azarkeşlərimizi sevindirmək üçün gəlmişik".

50 yaşlı mütəxəssis qeyd edib ki, sabahkı matçda futbolçularında olacaq həyəcanın onların xeyrinədir: "İstərdim ki, bu, bizim oyunumuza mənfi təsir etməsin. Rəqibə görə yox, qrupdan çıxan ilk Azərbaycan klubu olduğumuz üçün sevinc həyəcanı var. Hamı səbirsizliklə bu görüşü gözləyir. Belə oyunlar üçün təcrübəmiz var. Qrup mərhələsini aşıb bu cür oyuna çıxmaq bizdə daha çox istək və həvəs yaradır. Amma bunun həddindən artıq olmasını istəmirəm. Çünki komandamın çıxışına mane ola bilər. Balansı qorumağa çalışmışıq. Fikrimiz sırf rəqibin oyun üslubuna və oyunçularına meydanda nə etmək istədiklərinə yönələcək. İnanıram ki, bu həyəcan bizim xeyrimizə olacaq".

Q.Qurbanov "Marsel"in tez-tez oyun sistemini dəyişdirməsindən də danışıb: "Bu, bizə çətinlik yarada bilər. Çünki bu cür komandalara qarşı nadir hallarda oynayırıq. Rəqib bunu çox məharətlə edir. Daha çox diqqət yetirməli olduğumuz elementlərdən biri budurr. Məqsədimiz odur ki, meydanda öz oyunumuzu göstərək. Hər bir futbolçumuz bu matçın faydasını görəcək və verilən tapşırıqları dəqiqliklə yerinə yetirməyə çalışacaq".