Tanınmış ekspert Rusiyada birjanın “ölümünün” şərəfinə içdi - VİDEO

Tarix: 4 Mart 2022 18:08

"RBK İnvestisiya"nın "YouTube" kanalında Rusiya birjalarına, xarici səhmlərə və hazırda pul yatırmağın ən sərfəli olduğu yerlərə həsr olunmuş "Yeni üsulla ticarət" adlı xüsusi proqramda maraqlı hadisə baş verib.

Sonxeber.net oxu.az-a istinadən xəbər verir ki, belə ki, buraxılışın qonağı "Soyuzniki" investisiya klubunun təsisçisi, səhm strategiyaları üzrə iqtisadçı-ekspert Aleksandr Butmanov Rusiyada birjanın "ölümünün" şərəfinə içib.

Butmanovun ruh düşkünlüyü elə veriliş başlayanda görünüb: Aparıcı Elina Tixonovanın salamlamasından sonra o, "gününüz xeyir" deməyəcəyini bildirib.

Söhbət əsnasında Tixonova qonaqdan öz peşəsində qalıb-qalmayacağını soruşub. Cavabında ekspert 25 il əvvəlki kimi Şaxta baba olmağa hazırlaşdığını deyib.

Daha sonra o, bir şüşə qazlı su götürərək, birjanın "ölümü"nün şərəfinə içəcəyini bildirib.

"Zarafat bir yana, icazə verin bunu tez edim. 13 il əvvəl birjanın ölümünün şərəfinə içmiş Sergey Usiçenkoya ("Maksvell Kapital Menecment"in baş direktoru) salamlarımı göndərirəm. Bu gün qazlı su içirəm. Əziz fond birjası, sən bizə yaxın və maraqlı idin. Ruhun şad olsun, əziz yoldaş", - deyə A. Butmanov bildirib.

Bu hərəkətdən təəccüblənən aparıcı isə heç bir şəkildə bu fleşmob haqqında şərh verməyəcəyini deyib.