Bakıda sentyabr tıxacı başlayır - çıxış yolu nədir? - VİDEO

Tarix: 9 Sentyabr 2022 14:12

Bir neçə gündür ki, paytaxt yollarda günün pik saatlarında müxtəlif istiqamətlərdə tıxaclar yaşanır. Ekspertlər sentyabrın 15-dən, yəni yeni dərs ilinin başlanmasından sonra vəziyyətin daha ciddi olacağını proqnozlaşdırırlar. Bəs aidiyyəti qurumlar nə deyirlər ? Sərnişinlərin artan tələbatını ödəmək üçün hansı tədbirlər həyata keçiriləcək ?

Milli.Az Xəzər Xəbər-ə istinadən xəbər verir ki, yeni tədris ilinin başlamasına saylı günlər qalır.On minlərlə şagird və tələbənin təhsil müəssisələrinə gediş-gəlişi  paytaxtda yolların yükünü daha da artıracaq. Nəticədə böyük tıxaclar qaçılmaz olacaq.

Bakı Şəhər Dövlət yol polisi idarəsinin baş inspektoru Araz Əsgərli deyir ki, dərs ilinin başlanması ilə əlaqədar paytaxtda hərəkətin intensiv olduğu küçə prospektlərində gücləndirilmiş qayadada xidmət təmin olunacaq. Onun sözlərinə görə, respublika ərazisində qeydiyyata alınan 1 milyon 700 minə yaxın nəqliyyat vasitəsinin 70 faizi Bakıda idarə olunur. Bu, paytaxt yolarında hərəkət dinamikasına ciddi təsir edən əsas amillərdən biridir. Baş inspektor xüsusilə sentyabrın 15-də sürücüləri diqqətli olamağa çağırıb.

Ekspert Ərşad Hüseynov qeyd edib ki, 1 həftədən sonra paytaxt küçələrində son illər rast gəlmədiyimiz tıxaclara şahidlik edə bilərik. Onun sözlərinə görə indiki vəziyyətdə ictimai nəqliyyat artan təlabatı qarşılamaq iqtidarında deyil. Bakıda xəttə buraxılan avtobusların sayında da azalma müşahidə edilir. 

Bakı Nəqliyyat Agentliyinin Mətbuat Katibi Mais Ağayev bildirib ki, sentyabrın 15-dən sonra gözlənilən sıxlıq nəzərə alınaraq sərnişindaşıma fəaliyyəti ilə məşğul olan daşıyıcılara vətəndaşların təhsil müəssisələrinə, iş yerlərinə vaxtında, eyni zamanda rahat çatdırıması üçün tapşırıqlar verilib. 

Verilən tapşırıqların icra səviyyəsi isə sentyabrın 15-dən sonra məlum olacaq. 

Milli.Az