Gürcüstan gözlədiyi cavabı aldı - Nə dəyişəcək?

Tarix: 15 Dekabr 2023 20:48

Xəbər verdiyimiz kimi, Brüsseldə Avropa İttifaqı liderlərinin sammitində Gürcüstanın ittifaqa üzv olmaqla bağlı namizəd statusunun verilməsinə dair qərar qəbul edilib. Hazırda bir çoxunu bu qərarın Gürcüstan üçün əhəmiyyəti və nəyi dəyişəcəyi maraqlandırır.

Sonxeber.net qafqazinfo.az-a istinadən xəbər verir ki, Gürcüstanın "Geocase" araşdırma mərkəzinin Yaxın Şərq üzrə Araşdırma departamentinin direktoru və Avropa Universitetinin professoru Emil Avdalianinin fikrincə namizəd statusunun verilməsi hələ ölkənin Avropa İttifaqına daxil olacağına zəmanət vermir. 

Bununla belə, onun sözlərinə görə, istənilən halda Gürcüstana bu statusun verilməsi bir sıra müsbət nəticələrə səbəb olacaq: "Birincisi, bu qərar ölkədə daxili siyasi gərginliyi azaldacaq. İkincisi isə Tbilisinin Brüssellə münasibətlərini yaxşılaşdıracaq. Belə ki, son zamanlar Gürcüstanın Aİ-nin tövsiyələrini kifayət qədər fəal şəkildə yerinə yetirməməsinə görə tərəflərin münasibətində problemlər müşahidə edilir".

Namizəd statusu, həmçinin 2024-cü ildə ölkədə keçirilməsi planlaşdırılan parlament seçkilərinin gedişatı üçün də vacibdir. Ekspert qeyd edib ki, "Vahid Milli Hərəkat" partiyasının rəhbərlik etdiyi müxalifətin hazırda nə lazımi maliyyə resursları var, nə aydın gündəmi, nə də xarizmatik liderləri var. Hakim "Gürcü arzusu" partiyası isə hazırda böyük populyarlığa malik olsa da, seçicilərin əksəriyyətinin xüsusi rəğbətini qazana bilmir: "Namizəd statusu bu problemləri həll etməsə də, istənilən halda gürcü cəmiyyətində qütbləşməni azaltmağa kömək edəcək və "Gürcü arzusu"nun xeyrinə olacaq. Bununla belə, bu, həm də hakim partiyaya bir çox yeni məhdudiyyət qoyur. Rəhbərlik Brüsselin tələblərinə və gürcü seçicilərin xüsusilə də demokratikləşmə və iqtisadi islahatlar sahələrində artan gözləntilərinə daha ciddi yanaşmalı olacaq".

Professor hesab edir ki, bununla yanaşı, Gürcüstanın son illər həyata keçirdiyi çoxvektorlu xarici siyasətdən indi tamamilə imtina edəcəyini gözləmək lazım deyil. Bu siyasətə isə Aİ-nin rəqibləri, xüsusilə də Çinlə iqtisadi əlaqələrin gücləndirilməsi daxildir: "Lakin aydındır ki, Gürcüstanın Avropa İttifaqına doğru yolunda əsas maneə Çinlə deyil, Rusiya ilə olan münasibətlərdir. Rusiyanın 2022-ci ilin fevralında Ukraynaya qarşı genişmiqyaslı hərbi əməliyyata başlamasından bu yana Tbilisi bir neçə dəfə mövqeyini dəyişməli olub: Gürcüstan bir tərəfdən Kiyevə dəstəyini ifadə edib, digər tərəfdən isə beynəlxalq tənqidlərə baxmayaraq Moskva ilə əlaqələr yaradıb. Tbilisinin bu yanaşması Qərb tərəfdaşları ilə münasibətlərdə dəfələrlə narazılığa səbəb olsa da, bu, Rusiya ilə əlaqələrin möhkəmlənməsinə mane olmayıb". 

Avdalianinin fikrincə, Gürcüstan rəhbərliyinin Aİ-yə inteqrasiya və Rusiya ilə münasibətlərin saxlanılmasında balansı tapa biləcəyi böyük sual doğurur.