Büdcəsi göz qamaşdıran Moutinyulu "Braqa" - "Qarabağ"ın rəqibini tanıyaq

Tarix: 19 Dekabr 2023 14:38

Azərbaycan futbolu tarixində ilk dəfə Avropa Liqasının pley-off mərhələsinə yüksələn "Qarabağ" Portuqaliya təmsilçisi "Braqa" ilə qarşılaşacaq.

Miilli.Az fanat.az-a istinadən xəbər verir ki, yaşı bir əsrdən çox olan rəqibin xüsusi təqdimata ehtiyacı olmasa da, müəyyən məlumatları sizlərlə bölüşməyi uyğun saydıq.

102 yaşlı braqalılar

Tam adı "Sporting Clube de Braga" ("Braqa İdman Klubu") olan klub 1921-ci ildə yaradılıb. 1975-ci ildən davamlı olaraq elitada çıxış edir. Braqa təmsilçisinin "arxiyepiskoplar", "topçular" "Minyunun döyüşçüləri" kimi ləqəbləri var. Komanda evdə ağ-qırmızı, səfərdə isə göy forma ilə mübarizə aparır. Ehtiyat geyim dəsti isə mavidir. Eyniadlı şəhərin 102 yaşlı təmsilçisi hazırda ev oyunlarını 30 min 286 azarkeş tutumuna malik "Braqa Munisipal" stadionunda leçirir. Bu idman qurğusu 2004-cü ildə baş tutan Avropa çempionatı üçün tikilib.

Yeni əsrin yeni "Braqa"sı

"Qarabağ"ın rəqibini 21-ci əsrdə daha ciddi inkişafla diqqət çəkməsi faktdır. "Braqa" 2000-ci ildən sonra "böyük üçlük"də ("Sportinq", "Portu", "Benfika") olmadığı halda, Portuqaliyanın ən uğurlu klublarından birinə çevrilib. "Arxiyepikoplar" daxili arenada uğur qazanmaqla yanaşı, avrokuboklarda da iddialarını ortaya qoymağa başlayıblar. Bu yöndə "Braqa"nın ilk ciddi uğuru 2008-ci ilə təsadüf edib. Komanda son dəfə keçirilən İntertoto Kubokunun qalibi olub. 2009/10 mövsümündə "Braqa" "Benfika"nı 5 xal geridə qoyaraq çempionatının gümüş medallarını qazanıb və ilk dəfə Çempionlar Liqasının qrup mərhələsinə yüksəlib. Həmin turnir ilk olsa da, son olmayıb. "Topçular" UEFA Avropa Liqasında və Çempionlar Liqasında müntəzəm görünməyə başlayıblar. 2010/11 mövsümündə AL-in finalınadək irəliləyən "ağ-qırmızılar" Dublində baş tutan həlledici qarşıalşmada digər Portuqaliya klubu "Portu"ya 0:1 hesabı ilə yeniliblər.

Son ÇL macərası

2022/2023 mövsümündə 78 xal toplayaraq Portuqaliya çempionatının bürünc medallarına sahib çıxan "Braqa" təsnifat mərhələrini uğurla dəf edərək "Real Madrid", "Napoli" və "Union"la birlikdə Çempionlar Liqasının C qrupunda mübarizə aparmaq hüququ qazanıb. İspaniya nəhənginə hər iki oyunda uduzan (səfərdə 0:3, evdə 1:2) "topçular" Neapolda 0:2 hesabı ilə yenildiyi "Napoli"yə də evdə asanlıqla boyun əyməyib - 1:2. "Union"la öz meydanında bərabərliyə razılaşan (1:1) "Minyunun döyüşçüləri" Almaniyada qazandıqları qələbə (3:2) hesabına qrupda 3-cü yeri tutublar.

Baş məşqçi

"Arxiyepiskoplar"ın indiki baş məşqçisi 51 yaşlı sabiq müdafiəçi Artur Jorjedir. Jorje futbolçu olduğu dönəmdə məhz "topçular"ın uğurları üçün çalışıb. O, "Braqa"nın əsas komandasında 1992-2004-cü illər aralığında 240 rəsmi matça çıxıb. Daha öncə klubun aşağı yaş qrupları üzrə komandalarını və əvəzedicilərini çalışdırmış mütəxəssis ötən ildən indiki postundadır.  

Azarkeş qrupları

Ölkə birinciliyinin gümüş (2009/10) və bürünc medallarını, 3 dəfə Portuqaliya Kubokunu ( 1965/66, 2015/16, 2020/21) qazanmış "Braqa"nın çempionluğu olmasa da, "Bracara Legion", "Comandos Vermelhos", "Ultra Red Boys" kimi sadiq azarkeş qrupları var. Elə bu səbədən də "Braqa Munisipal"ın dolu tribunaları önündə oynamaq istənilən rəqib üçün çətindir.

Horta, Moutinyu, Bruma və konqolu qoleador

3 braziliyalı, 4 ispan və başqa ölkələrdən legionerləri olan "Braqa"da 20 yaşlı türk Serdar Saatçı da top qovur. Serdar cari mövsüm 8 matçda meydana çıxmağa imkan tapıb. Komandanın əsas qolçuları 27 yaşlı konqolu Simon Banza və Portuqaliya millisinin də formasını geyinən sol cinah vingeri Rikardo Hortadır. Banza cari mövsüm 14 oyunda rəqib qapılarına 13 dəfə yol tapıbsa, kapitan sarğısını daşıyan 29 yaşlı Horta 12 oyunda 7 qola imza atıb. Bir müddət "Qalatasaray"ın uğurları üçün çalışmış Bruma (12 oyuna 2 qol) əsas heyət üzvlərindən biridirsə, 37 yaşlı Joau Moutinyu illərlə qazandığı təcrübəni daha gənc komanda yoldaşları ilə bölüşür.

Büdcəsi və ən bahalı oyunçusu

"Transfermarkt" portalının məlumatına əsasən, "Braqa"nın illik büdcəsi 126 milyon avrodur. Klubun ən bahalı oyunçusu isə kapitan Hortadır - 20 milyon avro.

Portuqaliya çempionatındakı son vəziyyəti 

"Braqa" hazırda ölkə çempionatının turnir cədvəlində 4-yerdə qəralaşıb. Sözügedən kollektiv 14 tura 9 qələbə, 2 heç-heçə, 3 məğlubiyyətlə yadda qalıb. Bu qarşılaşmalarda 36 qol vuran "topçular" 21 dəfə topu tordan çıxarıb.

Milli.Az