PAŞA Bank Azərbaycanda ilk dəfə ''DevOpsDays'' beynəlxalq konfransı keçirdi

Tarix: 26 Noyabr 2019 11:30

Bakı. Trend:

22-23 noyabr 2019-cu il tarixlərində İT sahəsində fəaliyyət göstərən mütəxəssislər və tərtibatçılar üçün beynəlxalq "DevOpsDays" konfransı keçirildi. PAŞA Bankın “INNOLAND” İnkubasiya və Akselerasiya Mərkəzi ilə əməkdaşlıqda təşkil etdiyi “DevOpsDays” konfransı Azərbaycanda bu sahə üzrə beynəlxalq səviyyədə keçirilən ilk tədbir oldu.

Konfrans İT sahəsində çalışan iki yüzdən çox mütəxəssislərin marağını cəlb etdi. Tədbir zamanı proqram təminatının inkişafına və İT infrastrukturu sahəsində ən aktual məsələlərə, metodikalara və istifadə olunan texnologiyalara həsr olunmuş mövzular müzakirə olundu.

Tədbirdə iştirak edən PAŞA Bankın Baş icraçı direktoru Taleh Kazımov dedi: "Bir korporativ maliyyə institutu olaraq biz İT industriyasının ölkənin iqtisadiyyatı üçün nə qədər böyük əhəmiyyət kəsb etdiyini çox yaxşı başa düşürük. Ona görə də biz Azərbaycanda İT industriyasının inkişafına öz töhfəmizi verməyə davam edəcəyik".

Konfransda çıxış edən yerli və xarici ekspertlər, o cümlədən PAŞA Bankın Rəqəmsal Laboratoriyasının Rəqəmsal Mühəndislik şöbəsinin mütəxəssisləri rəqəmsallaşmaya doğru gedən şirkətlərin üzləşdiyi çətinliklər və uğurlu transformasiya üçün gərəkli amillər, güclü mühəndis heyətinin qurulması üçün mühəndislərdən tələb olunan bacarıq və biliklər, həmçinin mikroservislər arxitekturası, bulud infrastrukturu, Kubernetes açıq proqram təminatı, proqramlaşdırmada serversiz yanaşma kimi gündəlik iş həyatında istifadə olunan yeni texnologiyalar haqqında danışdı.

Qeyd edək ki, “DevOpsDays” konfransı dünyanın müxtəlif ölkələrində artıq 10 ildir ki keçirilən və DevOps metod və alətlərinin müzakirə edilməsi, həmçinin, məhsuldar görüşlər və yeni ideya və texnoloji həllərin ərsəyə gətirilməsi üçün əlverişli meydança olan beynəlxalq tədbirdir.

Tədbir haqqında daha ətraflı məlumat: https://devopsdays.az/

Trend-in ən mühüm və maraqlı xəbərlərini "Telegram"da izləyin