Ançelotti Ardaya əsəbiləşdi

Tarix: 28 Noyabr 2024 13:00

Çempionlar Liqasının 5-ci turunun dünən keçirilən "Liverpul" - "Real" matçında (2:0) Türkiyə millisinin futbolçusu Arda Güler əsas heyətdə yer alıb.

Sonxeber.net qol.az-a istinadən xəbər verir ki, bununla da 19 yaşlı oyunçu karyerasında ilk dəfə ÇL-in matçına "11-lik"də başlayıb. O, yarımmüdafiənin sağ cinahında yer alıb və cərimə meydançasına girməklə qol vurmağa çalışıb. 

Bununla belə, futbolçunun oyunu "Real"ın baş məşqçisi Karlo Ançelottini qane etməyib. Bu səbəbdən 56-cı dəqiqədə gənc yarımmüdafiəçi Lukas Vaskeslə (Lucaz Vazquez) əvəzlənib. Vaskes oyuna daxil olduqdan bir qədər sonra komandasına penalti qazandırıb. Lakin Kilian Mbappe bunu qola çevirə bilməyib. 

Matçda yaddaqalan anlardan biri də Ançelottinin Arda Gülerə hirslənməsi olub. Onun bir epizodda uğursuz zərbəsindən sonra italiyalı mütəxəssis əsəbiləşib. O, bunu əllərini yana açaraq ifadə edib. Eyni zamanda Ançelottinin "Arda" deyə qışqırması canlı yayımda efirdə eşidilib.

Matçdan sonra keçirilən mətbuat konfransında Ançelotti deyib ki, Arda müdafiədə yaxşı oynasa da, oyun zamanı daha uğurlu seçimlər edə bilərdi. "O, bu keyfiyyətə sahib futbolçudur. Arda çox gəncdir. Sadəcə olaraq, təcrübə baxımdan əskikliyi var" - deyə baş məşqçi qeyd edib.