Haftar ordusunun girov götürdüyü türklər danışdılar - Şok detallar

Tarix: 27 Dekabr 2019 21:40

Liviya Milli Ordusunun komandanı, general Xəlifə Haftar ordusuna bağlı donanma tərəfindən saxlanılan Türkiyə gəmisinin ekipaj üzvləri yaşadıqları gərgin anları media ilə bölüşüb.

Sonxeber.net Teleqraf.com-a istinadən bildirir ki, saxlanılandan 12 saat sonra sərbəst buraxılan heyətin üç üzvü Haftarın hərbçilərinin onları tutmaq üçün məxsusi olaraq gəldiyini açıqlayıblar.

Baş maşinist Möhsün Ərduran Misirə getmək üçün Malta limanından hərəkət edən gəmidə yalnız türk heyətə qarşı təzyiq olduğunu söyləyib: "Biz dekabrın 21-də saat 15:00-da Haftarın qüvvələri tərəfindən girov götürüldük. Haftar ordusunun hərbçiləri bizə durma əmri verdilər, biz də dayandıq. Sahilə 12 mil uzaqlıqdaydıq, 10-15 nəfərlik silahlı qrup gəmiyə qalxdı, heyətin digər gürcü və ukraynalı üzvlərinə heç nə etmədilər, sual belə vermədilər. Bizi ayırdılar, "türk heyət digər tərəfə keçsin" dedilər. Bizi Sahil Mühafizə gəmisinə apardılar, yoxlamadan sonra buraxacaqlarını söylədilər. Çox qorxmuşduq, hamısının əlində silah vardı, nə dedilərsə, elədik. Lakin bizi buraxmadılar, 11-12 saat tutdular, bir otağa saldılar. Hərdən yemək də verirdilər, bizdən niyə buraya gəldiyimizi soruşdular. Biz qadağan olan sahəyə girmədiyimizi söylədik. Sonra bizi gəmiyə gətirdilər, 3 gün orada girov kimi qaldıq. Ankaradan rəsmi şəxslər əlaqə yaratdılar, dövlətin bütün aidiyyatı qurumları arxamızda dayandı, bu, həqiqətən qürurverici idi".