Vüqar Bayramov: MİDA-nın mövcud elektron sisteminin qorunub saxlanması şəffaflıq baxımdan daha məqsədəuyğundur

Tarix: 30 Dekabr 2019 15:04

Bakı. Trend:

Daimi istifadə etdiyim idman kompleksində 2 idman müəllimi Mənzil İnşaatı Dövlət Agentliyinin (MİDA) keçirdiyi son elektron satışda mənzil sahibləri oldular. Özləri bildirdilər ki, heç bir ödəniş olmadan, sadəcə elektron seçimlə mənzil sahibi olublar. Etiraf edim ki, bu sevindirici haldır. Qeyd edim ki, həm-müəllifi olduğum “Azərbaycan Respublikasında uyğun qiymətə mənzil təminatının inkişafına” dair Strateji Yol Xəritəsində və eləcə də digər qanunverici aktlarda elektron satış şəffaflığın formalaşması aləti kimi təsbit olunub. Əslində, elektron satış şəffaflığın təmin edilməsi baxımdan vacibdir. Sadəcə, tələb ilə təklif arasında fərq olduğundan ilkin mərhələlərdə satışa çıxarılan mənzillərin sayı evə sahib olmaq istəyənlərin müraciətlərindən az idi. Qeyd edək ki, Yasamal Yaşayış Kompleksində inşa edilən 1843 mənzildən 1654-ü agentliyin sərəncamında idi. Onlardan 1390 mənzil artıq satılıb və digərləri rəsmiləşmək mərhələsindədir.

Trend-in məlumatına görə, bunu iqtisadçı-ekspert Vüqar Bayramov "Facebook" səhifəsində qeyd edib.

Paylaşımda daha sonra qeyd edilir: "Gələn ildən istifadəyə veriləcək Hövsan Yaşayış Kompleksində isə 2962 mənzil satışa çıxarılacaq. Hövsanda inşa edilən 11 binanın 7-si 7 mərtəbə, 4-ü isə 10 mərtəbəlidir. Həmin mənzillərin 436-ü hərbiçilərə veriləcək. Əslində, sosial evlər çərçivəsində daha çox mənzilin satışa çıxarılması tələb ilə təklif arasındakı fərqin aradan qaldırılmasına və artıq gələn il müraciətçilərin xeyli hissəsinin elektron sistem vasitəsi ilə evə sahib olmasına imkan verəcək. Bu baxımdan, mövcud elektron sistemin qorunub saxlanması şəffaflıq baxımdan daha məqsədəuyğundur.

Bizdə olan məlumata görə, “Güzəştli mənzil" sisteminə beynəlxalq patentin alınması məqsədilə Ümümdünya Əqli Mülkiyyət Təşkilatına (World Intellectual Property Organization) müraciət edib. Beynəlxalq təşkilat tərəfindən həmin iddia qəbul edilmiş və müvafiq prosedurların yerinə yetirilməsinə başlanılıb. Bundan öncə isə Azərbaycan Respublikasının Əqli Mülkiyyət Agentliyinin tabeliyində olan Patent və Əmtəə Nişanlarının Ekspertizası Mərkəzinin Müşahidə Şurasının Qərarı ilə “MİDA” əmtəə nişanı qeydiyyata alınıb. Həmçinin Əqli Mülkiyyət Agentliyi tərəfindən Sistemin müəlliflik hüquqları qeydiyyata alınaraq Əsərin Qeydiyyatı Haqqında Şəhadətnamə təqdim olunub. Digər tərəfdən, "Güzəştli mənzil" sistemi vasitəsilə həyata keçirilmiş onlayn mənzil seçimi prosesləri yekunlaşdıqdan sonra beynəlxalq audit şirkəti "Ernst & Young" (“EY”) "Güzəştli mənzil" sistemini kompleks audit yoxlamalarından keçirərək sistemdə aparılmış bütün əməliyyatları hərtərəfli təhlil edir və öz “SOC 3” rəyini təqdim edir.

İqtisadi və Sosial İnkişaf Mərkəzi (CESD) həmçinin şəffaflığın daha da artırılması məqsədi ilə MİDA tərəfindən mənzil almış şəxslərin adlarının internet səhifəsində yerləşdirilməsini təklif edir. Belə ki, Azərbaycan Prezidentinin imzaladığı “Mənzil İnşaatı Dövlət Agentliyinin fəaliyyəti ilə bağlı bəzi məsələlər haqqında” fərmanın 4.4.-cü maddəsinə əsasən, mənzilləri güzəştlə əldə etmək məqsədi ilə müraciət etmiş şəxslərin vahid və ictimaiyyət üçün açıq olan qeydiyyatının aparılması nəzərdə tutulub. Deməli, agentlik tərəfindən mənzil almış bütün şəxslərin adlarının ictimaiyyətə təqdim edilməsi üçün hüquqi baza var və bunun həyata keçirilməsi məqsədəuyğun olardı".

Trend-in ən mühüm və maraqlı xəbərlərini "Telegram"da izləyin