““Toy biznesmenlərinin” əksəriyyəti yoxa çıxıb”

Tarix: 21 Aprel 2020 16:58

Milli Məclisin deputatı Sadiq Qurbanov hazırda mövcud olan toy adətlərimizi tənqid edib.

Sonxeber.net qafqazinfo-ya istinadən xəbər verir ki, deputat Feysbuk hesabında bildirib ki, ta qədimdən toy ərəfəsi və sonrası bütün qohum-əqrəba toy evinə yığılar, yeni qurulacaq ailənin çatışmayanlarını müəyyən edər və hər kəs imkan daxilində yeni qurulan ailənin təməlinin möhkəm olması üçün maddi və mənəvi köməklik göstərərdi:

"Təəssüf ki, son illərdə toylar mahiyyətini dəyişib, bir növü rəqabət meydanına çevrilib. Bəzi işbazlar isə bu tendensiyadan sui-istifadə edərək, münbit psixoloji mühit, saxta rəqabət mühiti formalaşdırıb, fundamental ailə dəyərlərinin zədələnməsi hesabına külli miqdarda pul qazanırlar. Mən toy biznesini idarə edənləri, ölkə boyu sıralanan şadlıq saraylarını, restoranları nəzərdə tuturam. 

Maraqlıdır, illik dövriyyələri çox böyük rəqəmlərlə ifadə olunan "toy biznesmenləri" xalqımızın bu ağır günündə niyə gözə dəymirlər? İndi onlardan soruşmaq lazımdır, belə çətin günlərdə koronavirusla mübarizədə dövlətə dayaq oldunuzmu, cənab Prezidentin dəstək çağırışlarına qoşuldunuzmu? İmkansız, aztəminatlı ailələrə yardım etdinizmi? 

Müşahidələr belə deməyə əsas verir ki, "toy biznesmenlərinin" əksəriyyəti yoxa çıxıb. Koronavirusla Mübarizəyə Dəstək Fonduna ianə köçürən, ehtiyacı olanlara yardım kampaniyası aparan böyük restoran, şadlıq evi sahibləri barmaqla sayılacaq qədər azdır. Necə deyərlər, hər işdə bir xeyir var.

Fikrimcə, düşdüyümüz bu vəziyyət tələb edir ki, bir daha düşünüb-daşınaq, mövcud toy adət-ənənələrimizə yenidən baxaq. Toylarımızı əvvəlki məcrasına qaytaraq, xüsusən imkansız ailələri illərlə davam edən maddi-mənəvi çətinliyə salan mənasız bəhsəbəsdən, "el nə deyər" düşüncəsindən xilas edək. Belə psixoloji mühitdən sui-istifadə edərək asan yolla böyük pullar qazanan, lakin xalqın ağır günlərində gözə görünməyən işbazlara da bundan sonra çox da fürsət verməyək".