''Sosial özünütəcrid vətəndaşların hərəkət azadlığının məhdudlaşdırılması deyil, onların təhlükəsizliyinin təmin olunmasıdır''

Tarix: 22 Aprel 2020 13:06

Sosial özünütəcrid hərəkət azadlığının məhdudlaşdırılması deyil, tam əksinə vətəndaşların təhlükəsizliyinin təmin olunmasıdır.

Sonxeber.net xəbər verir ki, bunu Trend-ə açıqlamasında Milli Məclisin İnsan Hüquqları komitəsinin iclasında komitənin üzvü millət vəkili Hikmət Babaoğlu deyib.

O qeyd edib ki, hazırda postmodernist cəmiyyətlər informasiya cəmiyyəti kimi xarakterizə olunur:

"Ancaq bəzən informasiya platformasında informasiya istehlakçılarının hüquqları ya istismar, ya manipulyasiya edilir. Hazırda ölkəmizdə koronavirus təhlükəsinə qarşı çox ciddi mübarizə aparılır. Bununla bağlı xüsusi sosial izolyasiya tədbirləri həyata keçirilir.

Təəssüf ki, bəzi radikal marginal qruplar bunu ictimai rəyə insan hüquqlarının pozulması kimi təqdim etməyə çalışır. Hətta bunu insan hüquqlarının məhdudlaşdırılması kimi beynəlxalq təşkilatların da diqqətinə çatdırmaq istəyirlər".

Millət vəkili vurğulayıb ki, bu, indiki mərhələdə bizim aktuallaşdırmalı olduğumuz problemdir:

"Çünki sosial özünütəcrid əsla hərəkət azadlığının məhdudlaşdırılması deyil, tam əksinə, vətəndaşların təhlükəsizliyinin təmin olunmasıdır. Hazırkı pandemiya dövründə ictimai maraqlarımızın zəruri qıldığı karantin rejiminin tələblərinin bu cür manipuliyasiya edilməsi ümumi mənafelərimizə qarşı atılmış təhlükəli addım kimi qiymətləndirilməlidir.

Ona görə də radikal müxalifətin bu cür fəaliyyəti ictimai rəy tərəfindən şiddətlə qınanmalıdır".