Aktual mövzular: Dollar alış-satışı, Məzənnə, Neftin qiyməti

Naxçıvan Muxtar Respublikası rəsmiləri ilə “AzerGold” QSC arasında görüş keçirilib (FOTO)

Tarix: 20 Iyun 2019 11:33

Bakı. Trend:

İyunun 19-da Naxçıvan şəhərində Naxçıvan Muxtar Respublikası rəsmiləri ilə “AzerGold” QSC-nin rəhbər heyəti arasında ikitərəfli görüş keçirilib.

Naxçıvan Muxtar Respublikasının İqtisadiyyat naziri Tapdıq Əliyevin, Ekologiya və Təbii Sərvətlər naziri Mais Əliyevin, “AzerGold” QSC-nin İdarə Heyətinin sədri Zakir İbrahimovun, həmçinin sədr müavinləri, geoloji kəşfiyyat, dağ-mədən və hasilat sahələrinin koordinasiyası şöbələri üzrə rəhbər şəxslərin iştirak etdiyi tədbirdə Naxçıvan Muxtar Respublikasının Ortakənd-Xanağa sahəsində görülən işlər müzakirə olunub, gələcək planlar ətrafında geniş fikir mübadiləsi aparılıb. Görüş çərçivəsində bildirilib ki, 2018-2019-cu illərdə Ortakənd-Xanağa sahəsində ümumilikdə bir milyon kvadratmetr sahədə 6 min metrə yaxın geoloji-kəşfiyyat işləri həyata keçirilib. Kəşfiyyat işləri nəticəsində toplanan sınaqlar hazırda xarici laboratoriyada analiz edilir.

Qeyd edək ki, Ortakənd-Xanağa sahəsi məxsusi qızıl, kompleks mis-porfir, epitermal sulfid filizlərinin aşkarlanması baxımından potensial perspektivliyi ilə seçilir. Sahə daxilində köklü qızıl təzahürləri və bir sıra polimetal minerallaşma nöqtələri və çıxışları qeydə alınıb. “AzerGold” QSC 2017-ci ilin 4-cü rübündə Ortakənd-Xanağa sahəsində İtaliyanın aparıcı geofiziki şirkətləri ilə birgə kompleks geofiziki tədqiqatlar aparıb və 2018-ci ildən başlayaraq istismar öncəsi buruq-qazma işlərinə start verib.