Yeni Peşə Təhsil Mərkəzi gələcəkdə iş probleminizi həll edəcək

Tarix: 23 Sentyabr 2020 09:52

Bakı. Ceyhun Ələkbərov - Trend:

Sumqayıt Kimya Sənaye Parkında açılan Peşə Təhsil Mərkəzi sifarişçi ilə təhsil alanlar arasında birbaşa körpü yaradır.

Bunu Trend-ə açıqlamasında Milli Məclisin deputatı Şahin Seyidzadə deyib. Onun sözlərinə görə, yeni mərkəzin bir çox üstünlükləri var:

"Bildiyimiz kimi, son illər Azərbaycan dövləti tərəfindən peşə təhsilinə xüsusi diqqət yönəlib və Cənab Prezident İlham Əliyev tərəfindən 20 aprel 2016-cı ildə imzalanan xüsusi Fərmanla Təhsil Nazirliyi yanında Peşə Təhsili Üzrə Dövlət Agentliyi yaranıb. Bu da peşə təhsili sahəsində islahatların aparılmasına və bu sahənin inkişaf etdirilməsinə imkan yaradıb.

Sözsüz ki, Sumqayıt Kimya Sənaye Parkında Peşə Təhsil Mərkəzinin açılması xüsusi əhəmiyyət daşıyır. Sözügedən təhsil müəssisəsinin orada təhsil alan şəxslərə verəcəyi üstünlüklər barədə danışmaq istərdim. Öncə onu bildirim ki, həmin peşə məktəbində təhsil alan tələbələr artıq Sumqayıt Sənaye Parkı ərazisində istehsalat təcrübəsi əldə etmək imkanı qazanırlar.

Digər özəlliklərdən biri də odur ki, sənaye parkında yerləşən 15 rezident artıq bir sifarişçiyə çevirilir. Bundan irəli gələrək peşə mərkəzində 5 ixtisas üzrə tədris prosesinə başlamağa qərar verilib. Nəticədə oradan məzun olan şəxslər Kimya Sənaye Parkında yerləşən 15 rezident və o cümlədən, açıq bazar üçün bir mütəxəssisdir. Bu sənayə parkındakı Peşə Təhsil Mərkəzi, həmçinin sifarişçi ilə təhsil alanlar arasında birbaşa körpü yaradır".

Deputat əlavə edib ki, burada əsas məqamlardan biri də müxtəlif peşə və ixtisaslar üzrə mütəxəssislərin hazırlanmasıdır: "Hazırda 5 ixtisas üzrə peşə hazırlığı dərslərinin keçirilməsi nəzərdə tutulsa da, bu sayın gələcəkdə artırılacağı gözlənilir. O cümlədən, müvafiq kursların təşkili də mümkündür. Onu da əlavə edim ki, bu peşə məktəbi dövlət tərəfindən maliyyələşdirilib və peşə təhsili şəbəkəsinin bir parçası olub".