Azərbaycana milyardlar qazandıracaq LAYİHƏ - Ölkəmizin əhəmiyyəti artacaq

Tarix: 6 Yanvar 2021 15:32

"TAP vasitəsilə Azərbaycan kommersiya qazının cənubi Avropa bazarlarına çıxış imkanları əldə etməsi şübhəsiz ki, Azərbaycan üçün əlamətdar hadisədir".

Bunu Sonxeber.net-a açıqlamasında iqtisadçı-ekspert Elşad Məmmədov deyib.

Ekspert bildirib ki, Azərbaycan qazının Avropaya nəqli iqtisadi və enerji təhlükəsizliyinin təmin edilməsi nöqteyi nəzərdən olduqca mühümdür:

"Cənub Qaz Dəhlizi vasitəsilə biz faktiki olaraq Avropanın enerji təhlükəsizliyi nöqteyi nəzərdən ölkəmiz üçün öz ciddi töhfəmizi vermiş oluruq və eyni zamanda bu, Azərbaycan üçün qaz ixracatından əldə olunan valyuta həcminin artırılması deməkdir. Avropa bazarı kifayət qədər ciddi şəkildə, deyərdim kritik şəkildə enerji daşıyıcılarından asıllılıq hiss edir və bu nöqteyi nəzərdən faktiki olaraq alternativlərin kifayət qədər az olması nəzərə çarpır. Avropa Birliyinin bütün səylərinə baxmayaraq Rusiya qazının idxalından asıllılığı Avropa Birliyi tərəfindən azaltmaq demək olar ki, mümkün olmur.

Ona görə də hesab edirəm ki, Azərbaycan qazının Avropaya nəqli Avropa üçün Avropa Birliyinin fəlsəfəsinə əsasən bir tərəfdən sırf iqtisadi və enerji təhlükəsizliyinin təmin edilməsi nöqteyi nəzərdən olduqca mühümdür, digər tərəfdən də bu, Azərbaycanın Avropa üçün əhəmiyyətinin artmasına şərait yaradacaq. Çünki istər-istəməz həm siyasi, həm iqtisadi nöqteyi nəzərdən Azərbaycanın mövqeləri bölgədə möhkəmlənəcək.

TAP vasitəsilə Azərbaycana bütövlükdə qaz ixracatından təqribən 3 milyard dollara yaxın valyuta daxil olmasına şərait yaranmış olur. Bu da ölkədə bir sıra vacib, o cümlədən sosial layihələrin reallaşdırılması üçün imkanlar yaratmış olur. Ona görə də TAP, bütövlükdə Cənub Qaz Dəhlizi Azərbaycanın ixrac baxımından valyuta daxilolmalarının artırılması və bir sıra sosial, iqtisadi layihələrin həyata keçirilməsi üçün ölkəmizə imkanlar açır".

Təhməz Əsədov