Xəqani Cəmilli: Füzuli döyüşlərində şəhid olan gizir - VİDEO

Tarix: 15 Iyun 2021 17:20

Sizə vətən müharibəsində şəhadətə ucalmış daha bir qəhrəmanımızdan bəhs edəcəyik. Söhbət Yevlax rayon sakini olmuş Xəqani Cəmillidən gedir. O, Füzuli-Xocavənd istiqamətində gedən döyüşlərdə böyük şücaət göstərib. Xəqani Cəmilli ölümündən sonra 4 medalla təltif edilib.

Sonxeber.net xezerxeber.az-a istinadən bildirir ki, "Füzuliyə bayrağı sancıb, qələbə xəbərini çatdıracam". Vətən müharibəsində şəhadətə ucalmış Xəqani Cəmillinin valideynlərinə son sözləri məhz belə olmuşdu.

1995-ci il fevralın 22-də Yevlaxın Varvara kəndində anadan olan Xəqani Cəmilli orta məktəbi bitirdikdən sonra hərbi xidmətə yollanıb. Orduda nizam-intizamı ilə seçildiyindən komandirləri tərəfindən fəxri fərmanlarla təltif edilib. 

Hərbi sahəyə olan marağı, torpaqlarımızı azad etmək istəyi onu gizir kimi xidmət etməyə sövq edir. Ötən il vətən müharibəsi başlayanda qəhrəmanımız döyüşlərə Füzuli istiqamətindən qatılıb.

Xəqani Cəmilli Füzuli-Xocavənd istiqamətində gedən döyüşlərdə böyük şücaət göstərib. Elə bu ərazidə gedən gərgin döyüşlərin birində qəhrəmancasına şəhid olub.

Xəqani Cəmilli  ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə" və "Şuşanın azad olunmasına görə" medalları ilə təltif edilib.