Həkim-pediatr: Tərləmə nəticəsində itirilən minerallar orqanizmdə giləmeyvələrlə bərpa edilə bilər

Tarix: 15 Avqust 2021 19:45

Yayın qızmar dövründə istivurma və günvurma kimi təhlükəli hallarla yanaşı, həddən artıq tərləmə də təhlükəlidir. Tərləmə nəticəsində orqanizmdə çox miqdarda mineral duzun və suyun itirilməsi yorğun və halsız hiss etdirir. Çünki orqanizmdə gedən bütün biokimyəvi proseslər üçün su və minerallar lazımdır. Onlar azaldıqda maddələr mübadiləsi, orqanların fəaliyyəti zəifləyir, əzələ tonusu azalır, hətta düşünmə prosesi ləngiyir.

Sonxeber.net xəbər verir ki, həkim-pediatr Aytən İsmayılzadə AZƏRTAC-a bildirib ki, uzunmüddətli tərləmə və qabaqlayıcı tədbirlərin görülməməsi nəticəsində ürəyin gücü azalır, böyrəklərin işi çətinləşir, bağırsaqların hərəkətliyi pozulur və xəstədə baş ağrıları, halsızlıq, yorğunluq müşahidə edilir: "Həmin narahatlıqlar uşaqlarda daha tez büruzə verir. Uşaqlarda iştahasızlıq, ağlağanlıq, yuxu narahatlığı, qəbizlik əlamətlərinə daha çox rast gəlinir. Tərləmə şlakların, toksinlərin orqanizmdən kənarlaşması baxımından faydalı olsa da, itirilən duzları və mayeni tənzimləmək lazımdır. Yay aylarında isti çay içərək tərləmə prosesini artırmaq kimi vərdişlərdən uzaq dursaq, yaxşı olar. İsti havada çoxlu maye qəbul etmək, çay əvəzinə heç olmasa, meyvə şirələri içmək daha faydalıdır. Sulu meyvələr, qarpız, yemiş kimi qidalar yaxşı seçimdir".

Aytən İsmayılzadə qeyd edib ki, moruq, böyürtkən, qırmızı və qara qarağatdan hazırlanmış morslar (meyvə şirəsi) hər kəs üçün əla mineral mənbəyidir: "Bu giləmeyvələrin püresini dondurucuda saxlayaraq, mütəmadi olaraq su ilə qarışdırıb mors hazırlamaq mümkündür. Giləmeyvələrin tərkibində A, E, B qrupu və C vitamini bol miqdarda olur. Nəzərə almaq lazımdır ki, dondurulma zamanı giləmeyvələrin tərkibindəki vitaminlər məhv olmur. Bundan başqa, giləmeyvələr manqan, fosfor, dəmir, maqnezium və kalsiumla zəngindir. Bu giləmeyvələr həm də təbii fitonsid kimi virus infeksiyaları ilə mübarizədə faydalıdır. Ərik, şaftalı, gavalının da tərkibində çox miqdarda antioksidant, kalium, fosfor və müxtəlif vitaminlər var. Onları yalnız mürəbbə və kompot halında "ölü ərzaq" kimi qışa saxlamaq olmaz. Meyvə və giləmeyvələrdən ehtiyacını qarşılayacaq qədər mövsümündə istifadə etmək lazımdır".