İspaniya ''Dördlər finalı''nı təsdiqlədi

Tarix: 29 Aprel 2019 18:24

İspaniya Futbol Federasiyası Superkubokun formatı ilə bağlı dəyişikliyi təsdiqləyib.

Qol.az federasiyanın rəsmi saytına istinadən xəbər verir ki, yeni qaydaya əsasən, 2020-ci ildən etibarən Superkubok "Dördlər finalı" formatında keçiriləcək. Yarışda ölkə kubokunun finalçıları və La Liqanın qalibi ilə gümüş mükafatçısı mübarizə aparacaq. Əgər finalçılarla çempionatın ilk iki pilləsinin sahibləri üst-üstə düşərsə, bu zaman turnir cədvəlində ən yaxşı göstəriciyə malik və kubokun finalına vəsiqə qazana bilməyən digər klublar "Dördlər finalı"nda oynamaq hüququ qazanacaqlar.

Artıq yeni formatda keçiriləcək yarışın iştirakçıları məlumdur. "Barselona" və "Valensiya" kubokun finalçısı, "Atletiko" və "Real" isə La Liqada 2-3-cü yerlərin sahibi kimi "Dördlər finalı"nda mübarizə aparacaqlar. Oyunlar yanvar ayında olacaq. Final matçı həmin ayın 12-də oynanılacaq.

Superkubokun daha bir özəlliyi odur ki, yarış İspaniyada deyil, ölkə xaricində keçiriləcək.