Zelenski Qərbdən ən çox ehtiyac duyulan silahların adını açıqlayıb

Tarix: 28 Mart 2022 13:50

Rusiya-Ukrayna müharibəsində mümkün qədər çox insanın həyatını xilas etmək Ukraynanın qələbəsi olacaq.

Sonxeber.net APA-ya istinadən xəbər verir ki, bu barədə Prezident Zelenski xarici jurnalistlərə bildirib.

Ukrayna lideri deyib ki, indi onun ölkəsinin Qərbdən ən çox ehtiyac duyduğu silahdır. "İlk növbədə təyyarələr. İkincisi isə tanklar", - Zelenski deyib.

"Ukraynanın qələbəsi necə görünür" sualına prezident belə cavab verib: "Qələbə mümkün qədər çox insanın həyatını xilas etmək üçün fürsətdir".

Zelenski həmçinin etiraf edib ki, dövlət başçısı kimi bunun bu qədər çətin olacağını gözləmirdi. "Bu qədər ağır olacağını gözləmirdim... mən qəhrəman deyiləm" deyə bildirən Ukrayna lideri bunun xalqının nailiyyəti olduğunu vurğulayıb.

Zelenski həmçinin bildirib ki, o, tez-tez Prezident Aparatından kənara çıxır, çünki yalnız bu yolla o, həqiqətən nə baş verdiyini dəqiq bilə bilər.

"İnsanların sizə inanması üçün dürüst olmalısınız. Özün olmalısan", - deyə dövlət başçısı bildirib.

Xatırladaq ki, Zelenski daha əvvəl Rusiya mətbuatına verdiyi müsahibədə fevralın 24-dən sonra ruslara münasibətinin dəyişib-dəyişməməsindən danışmışdı.

"Baxmayaraq ki, mən prezidentəm və kifayət qədər praqmatik olmalıyam, ancaq fevralın 24-dən sonra münasibət pisləşib. Çox pisləşib. Rusiya Federasiyasına, xalqa qarşı emosional komponent itib. Hətta xalqa münasibətdə..." Zelenski bildirib.