Dünyada aclıq olacaq - Ukrayna müharibəsinə görə

Tarix: 31 Mart 2022 13:02

Ukraynadan ixracat olmadığı üçün bəzi ölkələrdə aclıq baş verə bilər.

Sonxeber.net UNİAN-a istinadən xəbər verir ki, bu barədə məlumat telemarafonunun efirində aqrar siyasət və ərzaq nazirinin müavini Taras Vısotski bildirib.

Onun sözlərinə görə, Ukrayna son illərdə taxıl tədarükçüləri arasında ilk beşliyə düşüb, ona görə də bir çox ölkələrə buğda, arpa və qarğıdalı tədarükü ondan asılıdır. Ukrayna eyni zamanda günəbaxan yağının ilk tədarükçüsü, soya, quş əti, bal və süd məhsullarının əhəmiyyətli tədarükçüsüdür.

"Ukrayna məhsullarından ən çox asılı olan regionlara nəzər salsanız, bunlar Yaxın Şərq, o cümlədən Şimali Afrikadır... Misir Ukrayna məhsullarının əsas idxalçılarından biridir, bir də Cənub-Şərqi Asiya, xüsusən də İndoneziya, Koreya, Çin...", Vısotski qeyd edib.

O qeyd edib ki, Cənub-Şərqi Asiya ölkələri müvəqqəti olaraq özlərini başqa məhsullara yönləndirə bilərlər, amma Yaxın Şərq və Şimali Afrika ölkələri faktiki olaraq yalnız Ukraynadan tədarükdən asılıdır.

"Bir aydan çoxdur ki, limanlar bağlanıb. Təkcə taxıl deyil, ət məhsullarının, xüsusən də mal əti, quş əti, yumurta, süd məhsullarının ixracı da bağlanıb. Əslində bu, xeyli qıtlığa səbəb ola bilər. və həqiqətən də aidiyyəti ölkələrdə aclıq var", - nazir müavini izah edib.

Vısotski aydınlaşdırıb ki, Ukrayna günəbaxan yağı ixracının 55%-ni təşkil edir - bu, mütləq əksəriyyətdir. Eyni zamanda, Çin və Hindistandan başqa, Aİ ölkələri də əsas idxalçılardır. Aqrar Siyasət Nazirliyi qeyd edib ki, buna görə də Ukrayna təchizatı olmadan qlobal defisit yaranacaq.

Aslan Məmmədov