KİV: Almaniya qaz və neftə görə Rusiyaya rekord məbləğ ödəyəcək

Tarix: 22 Aprel 2022 21:16

Almaniya cari ildə Rusiyadan idxal olunan qaz və neftə görə rekord məbləğ ödəyəcək.

Sonxeber.net bildirir ki, AZƏRTAC "Deutsche Wirschafts Nachrichten" nəşrinə istinadla xəbər verir ki, Almaniya Rusiya neftinə xərclədiyi vəsaitin 11,4 milyard avrodan 14,3 milyard avroya yüksəlməsi təhlükəsi ilə üzləşib. Qaz idxalının xərcləri isə iki dəfə artaraq 8,8 milyard avrodan 17,6 milyard avroya çata bilər. Bundan əlavə, Rusiya kömürü üçün də təxminən 2 milyard avro ödənilməlidir.

Britaniyanın "Financial Times" nəşri isə hakimiyyət orqanlarının Rusiya qazının idxalından imtina etmək planlarının almanların bərk narahatlığına səbəb olduğunu yazır. Belə ki, Ukraynada müharibə başlamadan öncə Moskvanın bu bazardakı payı 55 faiz idi. Almaniya biznesinin nümayəndələrinin proqnozlarına görə, qazın qəfil dayandırılması ölkə sənayesinin əhəmiyyətli hissəsini iflic edə bilər.

Rusiya xammalına qoyulan embarqonun təkcə sənaye nəhənglərinə deyil, həmçinin kiçik kompaniyalara da mənfi təsir göstərəcəyi bildirilir. Belə ki, həmin kompaniyaların əhəmiyyətli hissəsi enerji təchizatı üçün uzunmüddətli müqavilələr bağlamayıb. Kiçik və Orta Biznes Birliyinin keçirdiyi sorğunun nəticələrinə görə, bu kateqoriyaya aid 42 min kompaniyanın yalnız iki faizi üç ildən artıq müddətə müqavilə bağladığını bildirib.