Qaranlığa qərq olan Ukraynanın peykdən görüntüsü yayımlandı - FOTO

Tarix: 19 Dekabr 2022 14:18

Sosial şəbəkələrdə Rusiyanın raket zərbələrindən sonra işıqsız qalan Ukraynanın peykdən çəkilən şəkli paylaşılıb.

Sonxeber.net oxu.az-a istinadən xəbər verir ki, görüntüləri ABŞ-nin Milli Aeronavtika və Kosmik Tədqiqatlar Administrasiyası (NASA) yayımlayıb.

Kadrlarda qonşu ölkələrin şəhərlərinin və infrastrukturunun parlaq işıqlarının əhatəsində qaranlığa qərq olmuş Ukrayna xüsusilə seçilir.

Qeyd edək ki, dekabrın 16-da Rusiya ordusu Ukraynanın müxtəlif sənaye komplekslərinə, həmçinin onları təmin edən enerji obyektlərinə yüksək dəqiqlikli uzaqmənzilli raketlərlə kütləvi zərbələr endirib. Nəticədə ölkə boyu elektrik enerjisinin verilişində problemlər yaranıb. NASA-nın nümayiş etdirdiyi kadrlar dekabrın 17-nə aiddir.

Xatırladaq ki, ABŞ-nin kosmik agentliyi noyabrın 24-də də Ukraynanın tam olaraq qaranlığa büründüyü barədə peykdən çəkilən fotolar yayımlamışdı.