''Qəbələ''nin yaşayacağına inanıram'' - Elmar Baxşıyev

Tarix: 24 Noyabr 2019 19:48

"Neftçi"yə qarşı fərdi hazırlaşmışdıq. İstəyirdik ki, rəqibi əks-hücumlarda rəqibi tutaq. Sadəcə, bunu həyata keçirə bilmədik. Komandalar arasında səviyyə fərqi çoxdur”.

Qol.az xəbər verir ki, bu sözləri “Qəbələ”nin baş məşqçisi Elmar Baxşıyev Premyer Liqanın 12-ci turunda bu gün “Neftçi”yə uduzduqları oyundan (1:4) sonra mətbuat konfransında deyib.

O, məğlubiyyəti belə şərh edib: “Bizim cavan kollektivimiz var, stabilliyi qoruya bilmirik. Bir oyun yaxşı oynayırıqsa, növbəti matçda bunu davam etdirə bilmirik. Sabit oyun göstərməməyimiz  komandanın gənc oyunçulardan qurulmasından irəli gəlir. Təcrübəlilər stabilliyi qoruya bilir. Üstəlik, “Neftçi” fərdi keyfiyyətlərdə də bizdən üstündür. Bizim də qol epizodlarımız oldu. Ancaq “Neftçi” futbolçularının ustalıq səviyyəsi üstün olduğuna görə bunlardan istifadə etdi”.

Maliyyə problemi səbəbindən “Qəbələ”nin dağılacağı ilə bağlı yayılan xəbərlərə münasibət bildirən Baxşıyev klubun yaşayacağına inandığını qeyd edib: “Bizim üzərimizə nə düşürsə, maksimumunu etməyə çalışırıq. Sponsor məsələsi bizə aid deyil. İşimiz komanda və futbolçularladır. İnanıram ki, “Qəbələ” yaşayacaq və daha yaxşı olacaq”.