''Uşaqlarınızı əldə etdiyi nəticəyə görə heç vaxt mükafatlandırmayın'' - TÖVSİYƏ

Tarix: 9 Avqust 2024 08:33

Uşaqlar ailənin güzgüsüdür ifadəsi əbəs yerə işlədilməyib. Uşaqların tərbiyə edilməsində və gələcəkdə sağlam bir fərd kimi yetişməsində valideynlərin rolu böyükdür.

Bəs valideynlər övladlarını tərbiyə edən zaman hansı nüanslara diqqət göstərməlidir?

Sonxeber.net xəbər verir ki, mövzu ilə bağlı sfera.az-a danışan psixoloq Ləman Məmmədova bildirdi ki, uşaqlar danışıqdan daha çox davranışlardan öyrənirlər:

"Valideynlərin dostları ilə münasibətləri, geyim və danışıq tərzi, xoşbəxtliyini və kədərini göstərmə üslubu uşaqların tərbiyəsində mühüm rol oynayır. Uşağımızı yaxşı tanımalı və fərqli təcrübələr yaşaması üçün ona azadlıq verməliyik. Ona yaxşını və pisi ayırd etməsi üçün kömək etməliyik. Valideyn olaraq övladımıza etdiyimiz kömək məcburi, darıxdırıcı və ya bezdirici olmamalıdır. Uşaqlara problemlərini özlərinin həll etməsi üçün imkan yaradılmalıdır, lakin onlar hər zaman valideynlərinin dəstəyini hiss etməlidirlər". 

Psixoloq qeyd etdi ki, uşaqlar əldə etdikləri nəticələrə görə, heç vaxt mükafatlandırılmamalı və cəzalandırılmamalıdır:

"Sadəcə onun problemləri həll etməsi üçün doğru yolu tapmasına kömək etmək lazımdır. Tərif deyərkən də xüsusilə diqqətli olmalıyıq, çünki bir uşağı çox tərifləmək onda arxayınlıq yaradacaq. Bu da onun daima özündən əmin olmasına və tənbəlləşməsinə səbəb olacaq".