Putinin “kölgə donanması” dünyanı çirkləndirir?

Tarix: 17 Oktyabr 2024 13:46

2021-ci ildən başlayaraq Rusiyanın "kölgə donanması"nın gəmiləri tərəfindən beynəlxalq sularda ən azı doqquz neft dağılması hadisəsi aşkar edilib.

Sonxeber.net axar.az-a istinadən xəbər verir ki, bu barədə "Politiko" nəşri və "SourceMaterial" qeyri-hökumət təşkilatının jurnalistlərinin apardıqları araşdırmada qeyd olunub.

"Jurnalistlər "SkyTruth" qeyri-hökumət təşkilatının peyk görüntülərindən istifadə edib və onu "Lloyd's List" və "Kpler" şirkətlərinin məlumatları ilə birləşdiriblər. Onlar Tailanddan Vyetnama, İtaliyaya və Meksikaya kimi dünyanın müxtəlif yerlərində Rusiyanın "kölgə donanması" ilə əlaqəli neft sızmalarını aşkar ediblər. Bu tankerlər həmçinin Qırmızı dəniz və Panama kanalı kimi yükdaşıma dəhlizlərindən keçirdilər. Bu o deməkdir ki, ciddi qəza baş verərsə, beynəlxalq ticarət yolları pozula bilər", - hesabatda bildirilib.

İsveçin xarici işlər naziri Mariya Malmer Stenerqard nəşrə açıqlamasında deyib ki, gəmilər dəniz mühiti üçün ciddi təhlükə yaradır və jurnalistlərin aşkar etdiyi hallar da bunu göstərir.

"Politiko" qeyd edib ki, bu gəmilərin əksəriyyəti sığortasızdır və ciddi neft sızması olacağı təqdirdə hökumətlərin onları məhkəməyə cəlb etməsi çətin olacaq.

Qeyd edək ki, Rusiya 600-dən çox tankerdən ibarət "kölgə donanması" yaradıb. Moskva bundan G7-nin neftə tətbiq etdiyi 60 dollarlıq qiymət baryerindən yayınmaq üçün istifadə edir.