Əlcəzairlə sosial sahədə əməkdaşlıq müzakirə olunub

Tarix: 5 Fevral 2020 16:03

Bakı. Trend:

Əmək və Əhalinin Sosial Müdafiəsi Nazirliyində Əlcəzairin Azərbaycandakı səfiri xanım Salima Abdelhak ilə görüş olub.

Nazirlikdən Trend-ə verilən məlumata görə, Azərbaycanla Əlcəzair arasında dostluq münasibətlərinin mövcud olduğunu qeyd edən Əmək və Əhalinin Sosial Müdafiəsi naziri Sahil Babayev iki ölkə arasında əməkdaşlıq əlaqələrinin genişləndirilməsinin, o cümlədən sosial sahədə əlaqələrin, təcrübə mübadilələrinin aparılmasının əhəmiyyətini vurğulayıb. Prezident İlham Əliyevin sosial siyasətinin nailiyyətlərini diqqətə çatdıran nazir ölkəmizdə əmək, məşğulluq və sosial müdafiə sahəsində aparılan islahatlar barədə məlumat verib. S.Babayev Azərbaycanda dövlət sosial xidmətlərinin DOST layihəsi əsasında, “bir pəncərə” prinsipi ilə təqdim edilməsi sahəsində innovativ təcrübəni qeyd edib.

Nazir İslam Əməkdaşlıq Təşkilatının (İƏT) Bakıda yaradılacaq Əmək Mərkəzi haqqında məlumat verib. Həmin Mərkəzin İƏT üzvü olan ölkələr, o cümlədən Azərbaycan və Əlcəzair arasında əlaqələrin genişlənməsində də mühüm rol oynayacğını vurğulayıb.

S.Abdelhak ölkəsinin Azərbaycanla əməkdaşlığa xüsusi önəm verdiyini qeyd edib, qarşılıqlı faydalı əlaqələrin inkişaf etdirilməsinin önəmini diqqətə çatdırıb.

Görüşdə beynəlxalq təşkilatlar çərçivəsində əməkdaşlığın və qarşılıqlı dəstək nümayişinin vacibliyindən bəhs olunub, gələcək əməkdaşlıq məsələləri müzakirə edilib.

Trend-in ən mühüm və maraqlı xəbərlərini "Telegram"da izləyin