Kompensasiya alacağını ilk dəfə ''Unibank'' əməkdaşından eşidən müştərilərimiz də var - Müsahibə

Tarix: 23 May 2019 12:18

Bakı. Trend:

"Unibank" müştərilərinin böyük əksəriyyəti kompensasiya məbləğini alıb. Bu haqda “Unibank” KB-nın Satış və xidmətə dəstək departamentinin müdiri Mikayıl Məmmədov bildirib.

- Bu həftə "Unibank"da kompensasiya ödənişləri başa çatır. Proses hansı mərhələdədir?

- Bildiyiniz kimi, Fərmanın əhatə etdiyi ən çox müştəri sayı Unibankın payına düşür. Fərmanın vacibliyini, istər müştərilər, istərsə də bank sektoru üçün böyük əhəmiyyətini ilk gündən dərk edərək, bütün resurslarımızı Fərmanın icrasının vaxtında bitməsi üçün səfərbər etmişik.

"Unibank" “Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Prezident fərmanının icrasına başlanıldığı ilk gündən gücləndirilmiş iş rejimində çalışır. Hətta ötən şənbə və bazar günü də gücləndirilmiş rejimdə fəaliyyət göstərmişik. Fərmanın daha operativ icrası məqsədi ilə bankın bütün filial əməkdaşları kompensasiya ödənişini həyata keçirməyə yönləndirilib. Fərmanın vaxtında və yüksək səviyyədə icrası bankın əsas prioritetidir. Demək olar artıq əksəriyyət müştərilərimizə kompensasiyalar ödənilib. Bütün müştərilərimizə filiala gəlib kompensasiya vəsaitini əldə etmələri üçün SMS bildirişlər göndərilib. Hansısa texniki səbəbdən SMS almayanların olduğunu nəzərə alaraq elan etmişik ki, kompensasiya siyahısında adı olan müştərilərimiz bu həftə bank filialarına müraciət edib kompensasiyasını götürə bilər.

- Ola bilərmi ki, hansısa müştərinin kompensasiya alacağından ümumiyyətlə xəbəri yoxdur?

- Kompensasiya siyahısında olan hər bir müştərimizin dövlətin ona ayırdığı vəsaiti vaxtında alması üçün bank olaraq bir çox tədbirlər həyata keçiririk. SMS göndərməklə kifayətlənməyərək bu həftənin əvvəlindən müştərilərə birbaşa zənglər edirik. Bank əməkdaşları müştərilərin sistemdəki əlaqə nömrələrinə zəng edərək, kompensasiyalarını götürmələri üçün filiala dəvət edirlər. Bu zənglər zamanı biz gözləmədiyimiz vəziyyətlə qarşılaşdıq. Məlum oldu ki, bir sıra müştərilərin ona kompensasiya hesablandığından ümumiyyətlə xəbəri yoxdur. Bank əməkdaşının zəngindən sonra müştəri filiala gəlib ona çatan məbləği götürür. Kompensasiya alacağını məhz "Unibank" əməkdaşının zəngindən öyrənən onlarla müştərimiz oldu. Birbaşa zəng zamanı bəzi müştərilərimizdən bankdan gələn kompensasiya məbləğini bildirən SMS-i oxumadıqlarını deyənlər də oldu. Məlumatsız olan bu müştərilərə xəbər vermək və onlara düşən vəsaiti əldə etmələrinə yardımçı olmaq bizi çox sevindirir. Bank olaraq bütün müştərilərimizn prosesin sonunadək kompensasiya məbləğini əldə etməsində maraqlıyıq.

- Əlaqə yaradılması ümumiyyətlə mümkün olmayan müştərilərin kompensasiya vəsaiti hansı formada ödəniləcək?

- Son günədək biz qalan bütün müştərilərimizlə əlaqə yaratmağa çalışacağıq. Əlaqə saxlanılması heç cür mümkün olmayan müştərilərə hesablanmış kompensasiya məbləğləri onların bankımızda olan hesabına köçürüləcək və müştəri istənilən vaxt gəlib bu vəsaiti hesabından götürə bilər.

- Hansı hallarda müştəriyə hesablanmış kompensasiya onun borcuna silinə bilər?

- Cənab Prezidentin Fərmanında da qeyd olunduğu kimi kompensasiyaların ödənişində əsas məqsəd müştərilərin kredit yükünün azaldılması, üzləşdiyi maliyyə itkisinin qarşısını almaqdır. Kompensasiya məbləğindən silinmələr yalnız müştərinin gecikmədə olan və ya məhkəmə qərarı olan krediti üzrə aparıla bilər. Bu proses isə müştərinin kredit yüklülüyünün azaldılmasına, məhkəmdə olan işlərin azalmasına xidmət edir. Gecikdirilən borcdan əlavə məbləğ isə müştərinin özünə qaytarılır. Heç bir gecikməyən kredit üzrə silinmə ola bilməz və olmayıb.

Trend-in ən mühüm və maraqlı xəbərlərini "Telegram"da izləyin