Abşeronda 28 yaşlı usta 7-ci mərtəbədən yıxılıb öldü

Tarix: 18 Avqust 2020 16:16

Abşeron rayonunda tikintidə ölüm hadisəsi baş verib.

Abşeron rayonunda tikintidə ölüm hadisəsi baş verib. Abşeron rayon prokurorluğundan Sonxeber.net-a verilən məlumatda bildirilir ki, hadisə avqustun 18-də saat 14 radələrində baş verib. Rayon ərazisində inşa olunan hündürmərtəbəli yaşayış binasından ustanın yıxılaraq aldığı xəsarətlərdən ölməsi barədə Abşeron rayon prokurorluğuna məlumat daxil olub.

Dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilmiş, digər prosessual hərəkətlər yerinə yetirilib.

İlkin araşdırmalarla müəyyən olunmuşdur ki, həmin gün saat 13radələrində 1992-ci il təvəllüdlü Hüseynov Savalan İmamverdi oğlu "Diadem" MMC tərəfindən rayonun "Stansiya Sumqayıt" adlı yaşayış massivində inşa olunan hündürmərtəbəli yaşayış binasının 7-ci mərtəbəsində suvaq işləri görərkən yıxılaraq aldığı xəsarətlərdən ölüb.

Faktla bağlı Abşeron rayon prokurorluğunda Cinayət Məcəlləsinin 222.3-cü (tikinti, mədən işlərinin və sair işlərin aparılmasının təhlükəsizlik qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb, o cümlədən zəruri ekspertizalar təyin olunub.
Hazırda iş üzrə zəruri istintaq hərəkətləri davam etdirilir.