Bu gündən Azərbaycanda peyvəndləmə işlərinə başlanılıb

Tarix: 24 Aprel 2019 11:12

Bakı. İlhamə İsabalayeva - Trend:

Bu gündən etibarən Azərbaycanda Avropa İmmunlaşdırma Həftəsi çərçivəsində peyvəndləmə işlərinə başlanılıb.

Trend-in məlumatına görə, bunu Səhiyyə Nazirliyi Respublika Gigiyena və Epidemiologiya Mərkəzinin direktor müavini Afaq Əliyeva deyib.

Onun sözlərinə görə, Avropa İmmunlaşdırma Həftəsi 24-30 aprel tarixlərində keçiriləcək.

A.Əliyeva əlavə edib ki, bu il qızılca və məxmərəyə qarşı ölkəyə 160 min vaksin gətirilib: "Vaksinlər mart ayı ərzində respublikanın bütün region və şəhərlərinə paylanılıb. Dünənə qədər respublika üzrə 110 min insana təmizləyici immunlaşdırma tədbirləri çərçivəsində vaksin vurulub".

Qeyd edək ki, Azərbaycanda 2017-ci ildən Avropa İmmunlaşdırma Həftəsi keçirilir. Hər il peyvənddən kənarda qalan 5-10 minə yaxın insan vaksinasiyaya cəlb olunur.

Trend-in ən mühüm və maraqlı xəbərlərini "Telegram"da izləyin