Polietilen torbalardan istifadə edənlərin nəzərinə - VİDEO

Tarix: 8 Yanvar 2021 12:00

Yanvarın 1-dən qalınlığı 15 mikronadək olan polietilen torbaların satışı qadağan edilib. Qanunvericiliyi pozan sahibkarlar üçün cərimələr də bəllidir. Yaxın vaxtlarda isə xüsusi tədbirlər planı hazırlanır. Sahibkarlarla yanaşı, vətəndaşlar da könüllü olaraq polietilen torbalardan imtina etməlidirlər.

Sonxeber.net xezerxeber.az-a istinadən bildirir ki, polietilen torbalardan istifadəyə nəzarət məqsədilə xüsusi Tədbirlər Planı hazırlanır. Qanunvericiliyin tələbini pozan sahibkarlıq subyektləri cərimələnəcək.

Mövcud qanunvericiliyə əsasən, 2021-ci il yanvarın 1-dən etibarən qalınlığı 15 mikronadək olan polietilen torbaların satışı qadağandır. Qanunvericiliyin tələblərinə riayət etməyən sahibkarlar cərimə ediləcək. Antiinhisar və İstehlak Bazarına Nəzarət Dövlət Xidməti tərəfindən bununla bağlı artıq xüsusi tədbirlər planı hazırlanır.

Polietilen torbalarla bağlı Ekologiya və Təbii Sərvətlər Nazirliyi tərəfindən də müvafiq müraciətlər hazırlanır. Dövlət Ekoloji Təhlükəsizlik Xidmətinin rəisi Hikmət Əlizadənin sözlərinə görə, həmin cərimələrlə üzləşməmək üçün mağaza sahibləri polietilen torbaları alan zaman müvafiq sənədləri tələb etməlidir. Nəzərə almaq lazımdır ki, bir çox ölkələrdə artıq polietilen torbalardan imtina olunub.

Satıcılar da qanunvericiliyin tələblərindən məlumatlı olduqlarını, lakin hələlik polietilen tobalara alternativ torbaları əldə edə bilmədiklərini deyirlər.

Qeyd edək ki, iyulun 1-dən birdəfəlik istifadə üçün nəzərdə tutulan plastik çəngəl, qaşıq, bıçaq, qarışdırıcı çubuq, boşqab və stəkanların sahibkarlar tərəfindən istehsalı və idxalı, həmçinin ticarət, ictimai iaşə və digər xidmət obyektlərində istehlakçıya satılması və ya xidmət zamanı istifadəsi qadağan edilir.