“Bu gün Azərbaycandan dəhşətli xəbər aldıq”

Tarix: 5 Iyun 2021 08:30

Minaların Qadağan Olunması Uğrunda Beynəlxalq Kampaniya (ICBL) Kəlbəcərdə üç mülki şəxsin ölümünə, dördünün isə yaralanmasına səbəb olan mina partlayışı ilə bağlı paylaşım edib.

Sonxeber.net "qafqazinfo"-ya istinadən xəbər verir ki, Beynəlxalq Kampaniya Kəlbəcərdəki hadisəni dəhşətli xəbər kimi dəyərləndirib:

"Bu gün Azərbaycandan mülki mina itkiləri ilə bağlı dəhşətli xəbər aldıq. Dağlıq Qarabağ münaqişəsinin ölümcül mirası insanları həyatdan məhrum etməkdə davam edir".

Qeyd edək ki, dünən saat 11:00 radələrində xidməti vəzifələrinin icrası ilə əlaqədar işğaldan azad edilmiş Kəlbəcər rayonuna ezam olunmuş televiziya kanallarının və xəbər agentliklərinin əməkdaşlarının olduğu "Kamaz" markalı sərnişin avtomobilinin rayonun Susuzluq kəndi istiqamətində hərəkətdə olarkən tank əleyhinə minaya düşməsi nəticəsində üç nəfər - Sirac Abışov (Az TV telekanalının operatoru), Məhərrəm İbrahimov ("Azərtac" xəbər agentliyinin əməkdaşı), Arif Əliyev (RİH başçısının Susuzluq kənd inzibati ərazi dairəsi üzrə nümayəndəsinin müavini) həlak olub, digər dörd nəfər isə müxtəlif dərəcəli bədən xəsarətləri almaqla xəstəxanaya yerləşdiriliblər.