BNA yanlış çəkilmiş avtobus zolağını niyə ləğv etmir? - VİDEO

Tarix: 4 Fevral 2022 13:20

Bakıda bir müddət əvvəl yanlış çəkilmiş avtobus zolağı hələ də ləğv edilməyib.   

Sonxeber.net Xəzər TV-yə istinadən xəbər verir ki, söhbət bir ay əvvəl, həll olunması üçün çəkib işıqlandırdığımız problemdən gedir.

Paytaxtın Rəşid Behbudov prospekti ilə Şəmsi Bədəlbəyli küçəsinin kəsişməsində bir yolun eyni hərəkət istiqamətində yanlış olaraq iki avtobus zolağı çəkilib.

Avtobus sürücüləri hər iki zolağın onlara aid olduğunu bildirsələr də, Bakı Nəqliyyat Agentliyi zolaqlardan birinin iş icraçısı tərəfindən səhvliklə çəkildiyini bildirmişdi. Lakin sürücülər hələ də bu problemdən narazıdır.

İlk dəfə, qurumun vədinə inanıb günün sonu əraziyə yollansaq da, elə hər iki avtobus zolağını yerdə görmüşdük.

Verilən vəddən 1 aydan çox vaxt keçsə də, səhvliklə çəkilmiş zolaq hələ də silinməyib. Maraqlıdır ki, bu zolağın silinməməsinin səbəbi, yerədəki boyanın keyfiyyətidir, yoxsa sözügedən qurumun məsuliyyətsiziyi? Bununla bağlı yenidən Bakı Nəqliyyat Agentiliyinə müraciət etdik.

Agentliyin mətbuat xidmətinin rəhbəri Mais Ağayev bildirdi ki, həmin zolaq iş icraçısı tərəfindən yanlışlıqla çəkilib və sonradan qara boya ilə silinib. İndi isə qara boya özü silindiyindən ikinci zolaq yenidən üzə çıxıb. Vəd edilib ki, 1-2 saat ərzində problem aradan qaldırılacaq. Ümid edirik ki, Agentliyin indi verdiyi vəd bundan öncəki kimi yalan olmaz. Əks halda bu problem çox sürücünün o zolaqlarda haqsız yerə cərimələnməsinə səbəb olacaq.

Mövzu ilə bağlı daha ətraflı videomaterialı təqdim edirik: