16 yaşında uşaq dünyaya gətirən qızla bağlı təfərrüat - VİDEO

Tarix: 12 Aprel 2022 17:24

Erkən nikah və onun fəsadları barədə kifayət qədər maarifləndirici tədbirlər görülsə də, görünür hələ də buna etinasız yanaşanlar var. Gəncədə 16 yaşlı qız uşaq dünyaya gətirib. Onun 14 yaşı olan zaman qeyri-rəsmi nikaha daxil olması üzə çıxıb. Hadisə ilə bağlı şəhər polisi tərəfindən araşdırmalara başlanıb.

Gəncə Perinatal Mərkəzdə 16 yaşlı qız övlad dünyaya gətirib. Yaxınları ilə xəstəxanaya gətirilən gənc ana dərhal əməliyyata alınıb və qeysəriyyə üsulu ilə çəkisi 4 kq, boyu 52 sm olan qız övladı dünyaya gətirib. Mərkəzin baş həkimi bildirib ki, anası xəstəxanada ilkin qeydiyyat zamanı qızının yaşı ilə bağlı yanlış məlumat verərək onu böyük göstərməyə cəhd etsə də tezliklə həqiqət ortaya çıxıb.

Baş həkim bildirir ki, 16 yaşlı ananın həddən çox piylənməsi və artıq çəkisi var. Bu da onun əsl yaşını müəyyən etməyə imkan verməyib.

Qonşuları da deyir ki, qızın 16 yaşlı olmasını məlumat yayılandan sonra biliblər.

Hazırda ananın və körpənin vəziyyəti kafi, stabildir. Ailə, Qadın və Uşaq Problemləri üzrə Dövlət Komitəsi də faktı tədiqləyib. Bildirilib ki,  erkən nikah və onun fəsadları barədə kifayət qədər maarifləndirici tədbirlər görülsə də, görünür hələ də bu kimi məsələlərə etinasız yanaşanlar var.

İlkin araşdırmalar zamanı gənc ananın 2020-ci ildə 14 yaşı olan zaman qeyri-rəsmi nikaha daxil olması məlum olub.  Daxili İşlər Nazirliyi də məsələyə münasibət bildirib.  Gəncə regional qrupunun baş inspektoru Eşqin Qasımov  bildirib ki, qeyd edilən faktla bağlı Gəncə şəhər Baş Polis İdarəsində müvafiq araşdırmalara başlanılıb. Araşdırmaların nəticəsindən asılı olaraq məsələyə hüquqi qiymət veriləcək.