Bakının sovetdən qalma ''təhlükə qutuları'': ekspert köhnə liftlərlə bağlı çıxış yolu göstərdi - VİDEO

Tarix: 8 Iyul 2022 17:08

Bakıda son zamanlar liftlərlə bağlı bədbəxt hadisələrin sayı artıb. Bu isə köhnə və nasaz vəziyyətdə olan liftlərin kifayət qədər çox olduğunu göstərir. Aidiyyəti qurum tez-tez texniki baxış keçirildiyini, sakinlər isə problemin uzun müddətdir davam etdiyini deyir. Çox uzağa getmək lazım deyil, elə son bir neçə ay ərzində baş verən hadisələrə nəzər salsaq ancaq bunu demək olar ki, görünən kəndə nə bələdçi???

Sonxeber.net Xəzər xəbər-ə istinadən xəbər verir ki, lift  köhnə olduğundan sakinlər istifadə etməyə qorxur.

Bakıda binalara müasir standartlara uyğun liftlər quraşdırılsa da, hələ də köhnə liftlər qalmaqdadır. Sakinləri belə bir  sual düşündürür ? İstismar  müddəti bitmiş liftlər  nə zamanlar yeniləri ilə dəyişdirİləcək ? Çünki bəzi  liftlər sakinləri mənzilə yox  ölümə aparır. Bir çox binalardakı istismar müddəti bitən bu "təhlükə qutuları" insanların mənzillərinə sağlam şəkildə çatmalarını şübhə altında qoyur. 

Bu gün mənzil başına çatmağımıza mane olan səbəb təkcə köhnə binalardakı istismar müddəti bitən və təmir yolu gözləyən liftlər deyil. Yeni tikililərdə də anoloji hal mövcuddur. Bu cür yaşayış binalarında liftlərin təhlükəsizliyinə nəzarət binanı idarəedən Mənzil Müştəriləri Müştərək Cəmiyyətlərinin səlahiyyətindədir. Son dövrlər yeni tikililərdə baş verən lift qəzalarının sayının artması isə adıçəkilən qurumun səlahiyyətlərini hansı səviyyədə icra etməsindən xəbər verir.

Təhlükəsizlik məsələləri üzrə ekspert  Elmar Nurəliyevin sözlərinə görə sərnişin liftlərində ağır tikinti məhsullarının daşınması da liftin istismar müddətinin tez başa çatmasına səbəb ola bilər. Buna görə də faciələrin yaşanmaması üçün liftlərə vaxtaşırı baxış keçirilməli, nasaz hissələr dəyişdirilməlidir.

Paytaxtda köhnə liftlərin təmiri və ya yeniləri ilə əvəz olunması məsələsinə  gəlincə, Bakı Şəhər İcra Hakimiyyətinin tabeliyində olan "Lifttəmir" İstehsalat Birliyindən "XəzərXəbər"ə bildirilib ki, təşkilat paytaxtdakı 5342 ədəd liftə müqavilə əsasında texniki xidmət göstərir. Liftlər hər ay növbəli şəkildə Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agenliyinin müfəttişliyi ilə birgə texniki baxışdan keçirilir və yalnız texniki təhlükəsizliyə cavab verən liftlərin növbəti il üçün istismarına icazə verilir. O da əlavə edilib ki, 2019-2021-ci illər ərzində paytaxtda 1206 lift yenisi ilə əvəz olunub və bu proses mərhələli şəkildə davam edir.

Bakıdakı lifltlərin necə  faizi istismara yararsızdır sualına isə İstehsalat Birliyindən cavab verilməyib.