Şakira həbs oluna bilər

Tarix: 29 Iyul 2022 10:04

İspaniya Prokurorluğu kolumbiyalı müğənni Şakiranın vergidən yayınma ilə bağlı məhkəməsi ərəfəsində ona həbs cəzasının cərimə ilə əvəzlənməsini təklif edib.

Sonxeber.net oxu.az-a istinadən xəbər verir ki, ittiham tərəfi hələ vaxtı müəyyən edilməmiş məhkəmə prosesinin baş tutmaması üçün təklif səsləndirib, lakin ifaçı bunu qeyri-mütənasib və maraqlarına zidd hesab edərək, razılaşmadan imtina edib. Razılığa gəlmək mümkün olmadığından, prokurorluq məhkəməyə ittiham aktı təqdim edəcək və məhkəmə onu təqsirli bildiyi təqdirdə Şakiranın həbsini tələb edəcək.

Qurum müğənnini 2012-ci ildən 2014-cü ilə qədər vergi ödəməməsi ilə bağlı cinayətlərdə ittiham edir. Ümumilikdə, söhbət 14,5 milyon avrodan gedir. Müğənninin müdafiəsi israr edir ki, həmin dövr üçün onun İspaniyada ildə 183 gündən çox vaxt keçirməsinə dair heç bir birbaşa sübut yoxdur. Belə olduqda isə Şakiranı vergi rezidenti hesab etmək olmaz.

İttiham tərəfi isə hesab edir ki, müğənni İspaniyanın "Barselona" futbol klubunun müdafiəçisi Jerar Pike ilə münasibətini nəzərə alaraq, vaxtının çox hissəsini məhz eyniadlı şəhərdə keçirib.