''Futbolçularım döyüşdü, çox gözəl oyun göstərdi'' - Regekampf

Tarix: 4 Avqust 2022 23:34

"Komandamı təbrik eləmək istəyirəm. Futbolçularım döyüşdü, çox gözəl oyun göstərdi".

Sonxeber.net apasport.az-a istinadən bildirir ki, bunu "Neftçi"nin baş məşqçisi Laurentsiu Regekampf Konfrans Liqasının III təsnifat mərhələsində Avstriya klubu "Rapid" üzərində 2:1 hesablı qələbə qazandıqları ilk oyun barədə danışarkən deyib.

Rumıniyalı mütəxəssis "Bakcell Arena"dakı qarşılaşmanın ardından mətbuat konfransında komandasının çıxışını dəyərləndirib: "Çox güclü rəqibə qarşı oynayırdıq. İlk dəqiqələrdən sona kimi güclü idik. Bu gün qələbəyə layiq idik. Oyunçularıma matçdan əvvəl dedim ki, bizə pozitiv nəticə lazımdır. Növbəti mərhələyə adlamaq üçün iki oyun keçirməliyik. Vyanadakı qarşılaşma çox çətin olacaq. Son dəqiqələrdə qol buraxdığımız üçün çox narazı qaldım. Amma bizim üçün heç nə dəyişmir. Gözləyirəm ki, komandam orada da eyni cür davranacaq. Avstriyada da qələbə qazanmağa çalışacağıq. Buna çalışmasaq, heç bir şansımız olmayacaq".