Sərxoşun fəvvarədə boğduğu qadını yoldan keçənlər xilas etdi - VİDEO

Tarix: 17 Avqust 2022 21:12

İspaniyanın Valensiya şəhərində bir sərxoş kişinin oğurluqda şübhəli bildiyi və fəvvarədə boğmağa çalışdığı qadını yoldan keçənlər xilas ediblər.

Sonxeber.net bildirir ki, hadisənin videosunu "The Sun" yayıb.

Sərxoş 52 yaşlı kişi qadınla birlikdə fəvvarədə çimib. Yoldan keçən bir nəfər onların şəklini çəkməyi təklif edib və kişi telefonunu ona verəndə qaçıb. Bundan sonra kişi qadının oğrunun şəriki olduğuna qərar verib və onu fəvvarədə boğmağa cəhd edib.

Kadrlarda onun bir qadını saçından tutaraq başını suya saldığı görünür. Ətrafdakılardan birinin qışqırması eşidilir: "O, onu öldürəcək!" Toplanan izdiham davakardan qurbanı buraxmasını xahiş edib, lakin o, onların xahişlərinə məhəl qoymayıb və onu boğmağa davam edib.

Qadını yoldan keçən və fəvvarəyə tullanan iki nəfər xilas edib. Onlardan biri sərxoş kişini boğmağa, digəri isə döyməyə başlayıb. Növbəti zərbədən sonra sərxoş huşunu itirərək zərərçəkmişi buraxıb. Üzərində yalnız alt paltarı olan qadın sudan dərhal çıxıb.

Bir neçə dəqiqədən sonra hadisə yerinə gələn tibb işçiləri zərərçəkənləri xəstəxanaya çatdırıblar. Davaçının qaşı və yanağı kəsilib, qurbanı isə zərbələrdən qançırlar alıb. Polis gələn zaman telefonu oğurlayan oğru, sərxoş kişini döyən şəxslər hadisə yerində olmayıblar.

Qadını boğmağa cəhd edən təcavüzkar adam öldürməyə cəhddən mühakimə olunacaq.

İrfan Vəliyev