İranda yoxsulluq pik həddə: İnsanlar orqanlarını satır

Tarix: 12 May 2023 12:24

İranda daxili orqanlarını satanların sayı artıb. Yoxsulluq səbəbindən insanlar bu addımı atmağa məcbur qalır. Bu alış-verişlər yasaqdır. Lakin bir qrup mafiya klinikaları gizli şəkildə belə işləri görürlər.

Milli.Az xəbər verir ki, bu sözləri Axar.az-a güneyli həkim Behzad Ağdamlı İranda orqan satışı ilə bağlı artan elanlardan danışarkən deyib.

O, bu cür elanların sayının artmasını "narahatlıq doğuran məsələ" kimi dəyərləndirib:

"İnsanlar maddi çətinlikdən qurtulmaq yolunu bədən üzvlərini satmaqda görür. Onlar birbaşa bu klinikalara müraciət edə bilmirlər deyə, divarlara elan yapışdırmaqla öz istəklərini çatdırırlar. Orqanını satanlarla klinikada işləyən xüsusi insanlar, yaxud da orqan almaq istəyən şəxslər əlaqə yaradır. Qiyməti razılaşdırıb, həmin klinikalarda əməliyyat edirlər".

Onun sözlərinə görə, ürəyini satmaq istəyən elan sahibləri belə var:

"Bu elanların sayı gündən-günə artır. Azı yüzünü özüm görmüşəm. Hətta bir elanda ürəyini satmaq istəyən şəxs də var idi. Gözlərini satanların sayı artıb".

Həkim əməliyyatlarda gigiyenik qaydaların pozulduğunu da istisna etməyib.

"Əməliyyatların səhiyyə və gigiyenik qaydalara uyğun olduğunu da demək çətindir. Bu orqanları İrandakı pullu adamlar alır. Hətta məndə olan gizli məlumatlara görə, xaricə - daha çox Skandinaviya ölkələrinə göndərilir. Qiymətlər isə yaşlı və cavan insanlara görə dəyişir".

Milli.Az