Şam yeməyini ailəsi ilə edən uşaqlar fərqli olur - Nazir

Tarix: 21 Iyun 2023 12:10

"Cəmiyyət adətən təhsildən narazıdır və təhsillə bağlı böyük gözləntiləri formalaşır".

Sonxeber.net xəbər verir ki, bunu elm və təhsil naziri Emin Əmrullayev "İnsan Resursları Zirvəsi 2023" tədbirinin açılış mərasimində deyib.

O bildirib ki, təhsilin yekunda kamil bir insan yaratmaq məqsədi var:

"Kamil insan nədir? Bəzi cəmiyyətlərdə bu dəyərlər üzərindən, bəzilərində isə əmək bazarındakı rolu qabardılır".

Nazir qeyd edib ki, bəzən belə fikirlər irəli sürülür ki, "gəlin 10 min texnoloq hazırlayaq":

"Bu, sanki ev tikəndə az investisiya qoyulmuş fundamentin üzərinə böyük yük qoymağa bənzəyir. Şam yeməyini bir yerdə edən ailələrlə, ayrı edənlərdə böyüyən uşaqların həm oxu, həm də riyaziyyat göstəricilərində çox böyük fərq var. Evdə kitab sayı, valideynlərin kitab oxumaq həvəsi, valideynlərin davranışı da prosesə böyük təsir edir. Biliyi bir başdan başqasına mexaniki olaraq götürüb qoymaq mümkün deyil. Bu, çox ciddi psixoloji inkişaf prosesidir. Təhsilin yekunda kamil bir insan yaratmaq məqsədi var. Müxtəlif cəmiyyətlərdə kamil insan fərqli başa düşülür. Bəzilərində daha çox dəyərlər üzərindədir, bəzilərində əmək bazarı daha çox qabardılır. Bu, artıq həmin cəmiyyətin seçimi məsələsidir. Həqiqətən də bir insanın inkişafında ailə, məktəb və ətraf mühit təsir edir. İnsan bir mühitdə dünyaya gəlir və həmin mühit onun inkişafında əsas amildir. Mühitlərin ölçülə bilən meyarları var".