Aktual mövzular: Dollar alış-satışı, Neftin qiyməti, COP29, Hava proqnozu
Tarix: 15 Yanvar 2024 06:28
İspaniya Superkubokunun finalında "Barselona"ya 4:1 hesabı ilə qalib gələn "Real Madrid"in hər bir futbolçusu 150 min avro alacaq.
Sonxeber.net report.az-a istinadən xəbər verir ki, bu barədə "Football Espana" məlumat yayıb.
Məlumata görə, "Real Madrid"in prezidenti Florentino Peres komanda və məşqçilər heyətini mükafatlandırmaq üçün 4 milyon avro ayırıb.
Qeyd edək ki, İspaniya Superkubokunun final oyununda "Real Madrid" "Barselona"ya qalib gəlib. Ər-Riyaddakı (Səudiyyə Ərəbistanı) "Əl-Əvval Park" stadionunda baş tutan qarşılaşma "Real Madrid"in 4:1 hesablı qələbəsi ilə başa çatıb.
Matçı Xuan Martinez Munueranın rəhbərlik etdiyi hakimlər briqadası idarə edib. "Real Madrid"in matçdakı üç qolunu braziliyalı Vinisius Junior vurub. O, 32 dəqiqə ərzində het-trik edib. "Barselona" bu qollardan yalnız birinin əvəzini çıxa bilib - 33-cü dəqiqədə Levandovski fərqlənib.
Qarşılaşmanın 64-cü dəqiqəsində Rodriqo "Real"ın 4-cü qolunu vurub: 4:1.
Beləliklə, "kral klubu" tarixində 13-cü dəfə İspaniya Superkubokunun sahibi olub.
Daha əvvəl İspaniya Superkubokunun yarımfinalında "Real Madrid" "Atletiko Madrid"i 5:3 hesabı ilə məğlub edib. Qalibi müəyyən etmək üçün əlavə vaxt lazım olub.
Matçın əsas vaxtı heç-heçə başa çatıb - 3:3. "Barselona" isə bundan əvvəl "Osasuna"nı əsas vaxtda 2:0 hesabı ilə inamlı məğlub etmişdi.
2023-cü ildə İspaniya Superkubokunun finalında "Barselona" "Real Madrid"i 3:1 hesabı ilə məğlub edib.