Banqladeşdə insanların ağıllarını itirdikləri sirli ''Güzgülər evi'' tapıldı

Tarix: 27 Oktyabr 2024 02:02

Banqladeşdə uzun illər siyasi məhbusların saxlandığı gizli yeraltı həbsxana aşkar olunub.

Sonxeber.net oxu.az-a istinadən xəbər verir ki, bu barədə "The New York Times" yazır.

Keçmiş məhbuslar burada işgəncələrə məruz qaldıqlarını, günəş işığını görmələrinə icazə verilmədiyini və hətta bəzilərinin ağıllarını itirdiyini iddia edirlər. Nəşrin məlumatına görə, həbsxananın kod adı "Aynagor" və ya "Güzgülər evi" olub.

NYT-nin qeyd etdiyi kimi, Şeyx Hasinanın 2009-cu ildə hakimiyyətə qayıdışı ilə bütün ölkəni yeni repressiya dalğası bürüyüb. 2004-cü ildə sui-qəsd cəhdindən sağ çıxandan sonra keçmiş baş nazir Banqladeşin ilk prezidenti olan atası Şeyx Mucibur Rəhman kimi "paranoik və avtokratik" liderə çevrilib.

Hüquq müdafiəçilərinin məlumatına görə, 2009-cu ildən bəri Banqladeşdə siyasi səbəblərdən 700-dən çox insan saxlanılıb, onlardan 80-nin meyiti tapılıb, daha 150 nəfər isə itkin düşüb.

Hasinanın avqustda hökumət əleyhinə etirazların ardından devrilməsindən sonra yoxa çıxanların çoxu "Güzgülər evi" kod adlı gizli yeraltı həbsxanada tapılıb. O, Dəkkədəki hərbi qarnizonun ərazisində yerləşir. Məhkumlar arasında hüquqşünaslar, fəallar, diplomatlar və ordu nümayəndələri də olub.