Model məşhur futbolçunu şərlədi, həbs olundu

Tarix: 11 Yanvar 2025 16:44

İspaniyanın Malaqa şəhər məhkəməsi "Milan"ın futbolçusu Teo Hernandesə böhtan atan rusiyalı model Luiza Kremleva ilə bağlı həbs qərarı verib. 

Sonxeber.net xəbər verir ki, bu barədə "Marca"məlumat yayıb. 

Hadisə 2017-ci ilin iyununda baş verib. Kremlevanın sözlərinə görə, Hernandes ona narkotik maddə verdikdən sonra Marbelladakı gecə klubunun dayanacağında ona təcavüz edib və döyüb. 

Modelin qanında narkotik maddə aşkar edilməyib, lakin cinsi əlaqə faktı təsdiqlənib. Futbolçu hər şeyin qarşılıqlı razılıq əsasında baş verdiyini bildirdikdən sonra ona qarşı irəli sürülən ittihamlar götürülüb.

Məlumata görə, Kremleva günahını etiraf edib və yanvarın 9-da İspaniya məhkəməsi ona 6 ay həbs cəzası verib.

Qeyd edək ki, Hernandes 2019-cu ildən "Milan"da çıxış edir. Bu mövsüm o, İtaliya klubunun heyətində bütün turnirlərdə 22 oyun keçirib, 3 qol vurub və 3 məhsuldar ötürmə edib.\\söz.az